ગોંડલના ભરૂડી પાસેથી 2 શખ્સો SOGની ઝપટે : દારૂની હેરાફેરી માટે લાંબા સમય સુધી ડ્રાઇવિંગ કરવા આરોપી ટેબલેટ લેતો હતો : વાપીના મેડિકલ સ્ટોરનું નામ ખૂલ્યું
રાજકોટ, : પેઇન કિલર તરીકે ઉપયોગમાં લેવાતી ટ્રામાડોલ નામક દવાનો હવે બંધાણીઓ નશા માટે ઉપયોગ કરતા હોવાનો ચોંકાવનારો ખુલાસો થયો છે. ગોંડલ નજીકથી એસઓજીએ ૭.૫૬ લાખની કિંમતની ટ્રામાડોલ ટેબલેટ સાથે કિરણ ચીમનભાઈ પટેલ (રહે. ઉદવાડા ગામ, તા. પારડી, જિ. વલસાડ, મૂળ લોદરા ગામ, તા. વીજાપુર, જિ. ગાંધીનગર) અને વૈભવ નારણભાઈ બાબરિયા (રહે. રતનપર, તા. રાજકોટ)ને ઝડપી લીધા હતા.
એસઓજીના પીએસઆઈ જી.જે. ઝાલાએ મળેલી ચોક્કસ બાતમીના આધારે ભરૂડી ટોલનાકા પાસે વોચ ગોઠવી ફોર્ચ્યુનર કારને અટકાવી તલાશી લેતા અંદરથી ટ્રામાડોલ ટેબલેટનો આ જથ્થો ઉપરાંત અંગ્રેજી દારૂની ૯૩ બોટલ પણ મળી આવી હતી. આ બંને ઉપરાંત કાર અને મોબાઇલ ફોન મળી રૂા. ૨૩.૬૬ લાખના મુદ્દામાલ સાથે બંને આરોપીઓની ધરપકડ કરી હતી.
એસઓજીને તપાસ કરતાં જાણવા મળ્યું હતું કે આરોપી કિરણ ટ્રામાડોલ ટેબલેટનું સેવન કરે છે. તે પોતાની ફોર્ચ્યુનર કારમાં દારૂની હેરાફેરી કરે છે. દિવસ-રાત કાર ચલાવતો હોવાથી ખાસ કરીને રાત્રે ઉંઘ ન આવે તે માટે ટ્રામાડોલ ટેબલેટ લેતો હતો. એકસાથે બે ટેબલેટ લઇ તેની ઉપર ચા પી લેતો હતો. પોલીસને તેણે જણાવ્યું કે તેમ કરવાથી તેની ઉંઘ ઉડી જતી હતી. પરિણામે લાંબા સમય સુધી કાર ચલાવી શકતો હતો.
હાલમાં સેલવાસથી દારૂનો જથ્થો ફોર્ચ્યુનરમાં ભરી સૌરાષ્ટ્રમાં તેની ડીલીવરી કરવા જતો હતો ત્યારે ઝડપાઇ ગયો હતો. તેણે વૈભવને દારૂની હેરાફેરીમાં મદદરૂપ થવા માટે સાથે લીધો હતો. આરોપી કિરણ વાપીના એક મેડિકલ સ્ટોરમાંથી ગેરકાયદે રીતે આ ટેબલેટનો જથ્થો લઇ આવતો હતો. હવે એસઓજીએ વાપીના મેડિકલ સ્ટોરના માલિકને ઝડપી લેવા તજવીજ શરૂ કરી છે.
ટેબલેટ લીધા બાદ ડ્રાઇવિંગ કરવાની મનાઇ, પરંતુ આરોપી ઉલ્ટું કરતો
ટ્રોમાડોલ ટેબલેટની નશાની જેમ લત લાગી જાય છે. એટલે જ તેને ડોક્ટરની સલાહ વગર લેવાની મનાઇ કરવામાં આવી છે. ગર્ભાવસ્થામાં અને સ્તનપાન કરાવતી મહિલાઓને પણ આ ટેબલેટ લેતા પહેલાં ડોક્ટરની સલાહ લેવાનું કહેવામાં આવે છે. આ ટેબલેટ લીધા બાદ દારૂના સેવનથી પણ બચવાની સલાહ આપવામાં આવે છે. કારણ કે ટેબલેટ લીધા બાદ ઉંઘ આવવા લાગે છે, શ્વાસને લગતી સમસ્યાઓ પણ ઉભી થઇ શકે છે. આ ટેબલેટ લીધા બાદ વાહન ચલાવવાની પણ મનાઇ ફરમાવવામાં આવે છે. આમ છતાં તેનાથી વિરૂધ્ધ જઇ આરોપી કિરણ ટેબલેટ લીધા બાદ લાંબા સમય સુધી ડ્રાઇવિંગ કરતો હતો !!
