વટાદરા ગામના નાકા પાસેથી બાઇકોની ચોરીમાં બે પકડાયા

ચાર મોટરસાઇકલ જપ્ત

ગ્રામ્ય વિસ્તારોમાં એકલ દોકલ પડેલી બાઇકોની ચોરી કરતા હોવાની શખ્સોની કબૂલાત

ખંભાત ગ્રામ્ય પોલીસની ટીમે વટાદરા ગામના વિવિધ નાકાઓ ઉપર વોચ ગોઠવી હતી.  દરમિયાન બે યુવકો બાઈક ઉપર આવી ચડતા પોલીસે બંનેને શંકાને આધારે અટકાવી તેઓની પાસેના બાઈક ના દસ્તાવેજી પુરાવાની માંગણી કરતા બંને પાસે નહીં હોવાનું જાણવા મળ્યું હતું. પોલીસે વધુ તપાસ કરતા બાઈક ચોરી કરેલી હોવાનું જાણવા મળ્યું હતું. પોલીસે બંનેના નામ ઠામ અંગે પૂછતા તે નિલેશ ઉર્ફે નીલિયો ઉર્ફે કાળીયો લાલભાઈ ભેઠી (મૂળ રહે દાહોદ હાલ રહે સાણંદ અમદાવાદ) અને વિરેન્દ્રસિંહ ઉર્ફે વીરુ સુભાષસિંહ ગોહિલ (મૂળ રહે વટાદરા ખંભાત હાલ રહે સાણંદ) હોવાનું જણાવ્યું હતું. પોલીસે બંનેની વધુ પૂછપરછ કરતાં તેમણે ખંભાતના વટાદરા જહાજ વત્રા અને વિરસદ ખાતેથી અલગ અલગ બાઈકોની ચોરી કરી હોવાની કબુલાત કરી હતી. મોરૈયા ગામે આવેલી ફેક્ટરીમાં સાથે કામ કરતા બંને વચ્ચે મિત્રતા થઈ હતી અને બંને મિત્રો વિરેન્દ્રસિંહના મૂળ ગામ વટાદરા ખાતે આવતા ત્યારે ગ્રામ્ય વિસ્તારોમાં એકલ દોકલ બાઈકો પડયા હોય તેની ચોરી કરી ફરાર થઈ જતા હોવાની કબુલાત કરી હતી. પોલીસે બંને પાસેથી ચોરીના કુલ ચાર બાઈકો જપ્ત કરી કાર્યવાહી હાથ ધરી હતી.