રણોલીના મકાનમાંથી રોકડ અને દાગીના ચોરી જનાર રીઢો ગુનેગાર પકડાયો,22 ગુનામાં સંડોવણી

વડોદરાઃ રણોલીના મકાનમાંથી રોકડ અને દાગીનાની ચોરી કરનાર રીઢા ગુનેગારને પોલીસે ઝડપી પાડયો છે.

રણોલીની ગાયત્રી ટાઉનશિપમાં ગઇ તા.૧૦ મી મે થી ૧૨મી મે દરમિયાન ત્રાટકેલા ચોરો રોકડા રૃ.૪૦ હજાર અને દાગીના મળી કુલ રૃ.બે લાખની મતા ચોરી ગયા હતા.જેની તપાસ દરમિયાન ક્રાઇમ બ્રાન્ચે દિલબારસિંગ તુફાનસિંગ બાવરી(વીમાના દવાખાના પાસે, વારસિયા)ને ઝડપી પાડયો છે.

પોલીસના કહ્યા પ્રમાણે,દિલબારસિંગની સાથે ચંદન રાજપૂત અને અન્ય એક સાગરીત પણ સામેલ હતા.જેમાંથી એક સાગરીતને તેણે ચોરીના ભાગ પેટે રોકડ રકમ અને ચાંદીનો સેટ આપી દીધા હોવાની માહિતી ખૂલી છે. દિલબારની અગાઉ વાહનચોરી,ઘરફોડ અને અછોડા તોડવા જેવા ૨૨ ગુનાઓમાં સંડોવણી જણાઇ આવી હતી.