મ્યુનિસિપલ કોર્પોરેશન તંત્રને લગ્નની સિઝનમાં પાર્ટી પ્લોટની માંગ વધતા ૧૩.૮૧ કરોડ આવક થઈ

અમદાવાદ, શુક્રવાર, 6 માર્ચ,2026

સમયની સાથે અમદાવાદના લોકો લગ્ન કે સામાજિક પ્રસંગોએ મ્યુનિસિપલ કોર્પોરેશન હસ્તકના પાર્ટી પ્લોટ કે કોમ્યુનિટી હોલના વપરાશ ઉપર પસંદગી વધારાતા ગયા છે. લગ્નની સિઝનમાં પાર્ટી પ્લોટની માંગ વધતા કોર્પોરેશનને રુપિયા ૧૩.૮૧ કરોડની આવક થઈ છે.સાત મહિનામા તંત્રને કોમ્યુનિટી હોલ અને પાર્ટી પ્લોટના ૭૪૫૮ બુકિંગ મળ્યા છે.

શહેરના સાત ઝોનમાં કુલ ૯૫ કોમ્યુનિટી હોલ, પાર્ટી પ્લોટ, ઓડિટોરીયમ, પીકનીક હાઉસ તેમજ ઓપનએર થિયેટર આવેલા છે.આ પૈકી ૮૨ સ્પોટ હાલ ઉપલબ્ધ છે. ૧૩ સ્પોટ ઉપર રીનોવેશનની કામગીરી ચાલી રહી છે.૨૮ ફેબુ્આરી સુધીમા મધ્યઝોનમાં આવેલા ૧૧ પાર્ટી પ્લોટ અને કોમ્યુનિટી હોલ માટે કુલ ૭૪૪ બુકિંગ નોંધાતા તંત્રને રુપિયા ૬૫.૩૮ લાખની આવક થઈ હતી. આ ઉપરાંત પૂર્વ ઝોનમાં આવેલા ૧૮ પાર્ટી પ્લોટ અને કોમ્યુનિટી હોલ માટે કુલ ૬૭૮બુકિંગ નોંધાતા તંત્રને રુપિયા ૧.૨૫  કરોડની આવક થઈ હતી.ઉત્તર-પશ્ચિમ ઝોનમાં આવેલા ૯ બેન્કવેટ હોલ ,પાર્ટી પ્લોટ અને કોમ્યુનિટી હોલ માટે ૧૨૩૮ કાર્યક્રમ માટે બુકિંગ મળતા તંત્રને રુપિયા ૩.૧૫ કરોડ આવક થઈ હતી.ઉત્તરઝોનમાં આવેલા ૧૪ પાર્ટી પ્લોટ અને કોમ્યુનિટી હોલ માટે કુલ ૧૨૩૮ બુકિંગ નોંધાતા તંત્રને રુપિયા ૧.૯૮ કરોડની આવક થઈ હતી.દક્ષિણ-પશ્ચિમ ઝોનમાં આવેલા૬ બેન્કવેટ હોલ ,પાર્ટી પ્લોટ અને કોમ્યુનિટી હોલ માટે ૪૯૮ કાર્યક્રમ માટે બુકિંગ મળતા તંત્રને રુપિયા ૧.૪૩  કરોડ આવક થઈ હતી.દક્ષિણઝોનમાં આવેલા ૧૮ પાર્ટી પ્લોટ અને કોમ્યુનિટી હોલ માટે કુલ ૧૬૭૪ બુકિંગ નોંધાતા તંત્રને રુપિયા ૨.૪૮ કરોડની આવક થઈ હતી. પશ્ચિમ ઝોનમાં આવેલા ૧૯ પાર્ટી પ્લોટ અને કોમ્યુનિટી હોલ માટે કુલ ૧૬૯૫ બુકિંગ નોંધાતા તંત્રને રુપિયા ૨.૮૪  કરોડની આવક થઈ હતી.

પાંચ નવા ઓડીટોરીયમ બનાવાશે

વર્ષ-૨૦૨૬-૨૭ના કોર્પોરેશનના વાર્ષિક અંદાજપત્રમાં રુપિયા ૧૫ કરોડના ખર્ચથી પાંચ નવા ઓડીટોરીયમ બનાવવા નિર્ણય કરાયો છે.જેમા બોપલ,કઠવાડા, ચિલોડા,નિકોલ અને લાંભા વિસ્તારનો સમાવેશ કરવામા આવ્યો છે.