વડોદરા મ્યુનિ. કોર્પોરેશનના વર્તમાન બોર્ડની મુદત પૂર્ણ થવાના અંતિમ દિવસે પણ વિવાદ સર્જાતા રાજકીય ગરમાવો જોવા મળ્યો હતો. સયાજી બાગ ખાતે યોજાયેલા યાદગીરીરૂપ ગ્રુપ ફોટો સેશન દરમિયાન ભાજપમાં આંતરિક મતભેદો ખુલ્લા પડ્યા હતા, જ્યારે કોંગ્રેસે કાર્યક્રમનો બહિષ્કાર કર્યો હતો.
મ્યુનિ. કોર્પોરેશન દ્વારા સમગ્ર વર્ષ વિભાગમાં રહેલા બોર્ડની યાદગીરી માટે સયાજી બાગ ખાતે ગ્રુપ ફોટો સેશનનું આયોજન કરાયું હતું. આ કાર્યક્રમ દરમિયાન પૂર્વ મેયર નિલેશ રાઠોડ અને અલ્પેશ લીંબાચિયા વચ્ચે થયેલા વિવાદના કારણે નિલેશ રાઠોડ નારાજ થઈ ફોટો સેશનમાંથી ચાલતા થયા હતા. જોકે બાદમાં સિનિયર કાઉન્સિલરોએ તેમને સમજાવી ફરીથી પરત લાવ્યા હતા. એક વાત એ પણ છે કે, મહિલા કાઉન્સિલરએ
ખુરશી ન આપતા તે નારાજ થયા હતા. બીજી તરફ કોંગ્રેસે આ ફોટો સેશનનો બહિષ્કાર કર્યો હતો. કોંગ્રેસના નેતાઓએ આક્ષેપ કર્યો હતો કે શાસકોએ વડોદરા શહેરને અધોગતિ તરફ ધકેલ્યું છે અને નાગરિકોને મળતી સુવિધાઓ તેમજ વહીવટી કામગીરીમાં તેઓ સંપૂર્ણપણે નિષ્ફળ રહ્યા છે.
વધુમાં જણાવ્યું હતું કે, બજેટની છેલ્લી સભા દરમિયાન મેયરને પ્રજાલક્ષી રજૂઆતો સાંભળવી ન પડે તે માટે કોંગ્રેસના કાઉન્સિલરોને સસ્પેન્ડ કર્યા હતા. શહેરના વિકાસના મામલે વડોદરા છેલ્લા દસ વર્ષ પાછળ ધકેલાઈ ગયું છે, તેમજ કલંકિત બોર્ડના સાક્ષી બનવા તેઓ તૈયાર નથી, તેથી ફોટો સેશનનો બહિષ્કાર કર્યો હોવાનું કોંગ્રેસે સ્પષ્ટ કર્યું હતું.
