ધોળકામાં એટીએમ કાર્ડ ચોરી કરી નાણાં ઉપાડી લેનાર તસ્કર ઝડપાયો

બેંકના સીસીટીવી ફૂટેજના આધારે

ટાઉન પોલીસે ગણતરીના કલાકમાં તસ્કરને ઝડપી પાડી એટીએમ અને રિકડ રિકવર કરી

બગોદરા - ધોળકાના અમનપાર્ક વિસ્તારમાં આવેલી 'આર.કે. ઓટો એસેસરીઝ' નામની દુકાનમાંથી એક શખ્સે એટીએમ કાર્ડની કીટ ચોરી કરી હતી. આ તસ્કરે તુરંત પંજાબ નેશનલ બેંકના એટીએમ સેન્ટર પર પહોંચી કાર્ડનો ઉપયોગ કરી ગેરકાયદેસર રીતે રૃ. ૨૫,૦૦૦ ઉપાડી લીધા હતા.

આ બાબતની જાણ થતા જ ભોગ બનનાર દ્વારા પોલીસનો સંપર્ક કરવામાં આવ્યો હતો. ધોળકા ટાઉન પોલીસની સર્વેલન્સ ટીમે આ કેસમાં ટેકનિકલ તપાસ અને બેંકના સીસીટીવી ફૂટેજ તપાસતા આરોપીની ઓળખ થઈ હતી. બાતમીના આધારે પોલીસે ગણતરીના કલાકોમાં જ કલ્પેશ લાલજીભાઈ પ્રજાપતિ નામના શખ્સને ઝડપી લીધો હતો. પોલીસની પ્રાથમિક તપાસમાં આરોપી પાસેથી ચોરાયેલું એટીએમ કાર્ડ અને ઉપાડેલી તમામ રોકડ રકમ રિકવર કરવામાં આવી છે.