જામનગરની ઠેબા ચોકડી પાસે અકસ્માતની હારમાળા!, ટ્રકચાલકે એક સાથે પાંચ વાહનોને અડફેટે લીધા

Accident In Jamnagar: જામનગર શહેરની ભાગોળે અકસ્માત ઝોન તરીકે કુખ્યાત બનેલી ઠેબા ચોકડી પાસે શનિવારે (16મી મે) મોડી રાત્રે વધુ અકસ્માત સર્જાયો છે. પૂરપાટ ઝડપે આવી રહેલા એક ટ્રકે એકસાથે પાંચથી વધુ વાહનોને અડફેટે લેતાં હાઈવે પર ચીસાચીસ અને અફરાતફરીનો માહોલ સર્જાયો હતો. આ ગંભીર દુર્ઘટનામાં બાઈકચાલક યુવાનને ગંભીર ઈજાઓ પહોંચી છે, જ્યારે અકસ્માતને પગલે હાઈવે પર કિલોમીટરો લાંબો ટ્રાફિક જામ થઈ ગયો હતો.

એકસાથે પાંચ વાહનોનો કચ્ચરઘાણ

મળતી માહિતી અનુસાર, ઠેબા ચોકડી નજીક આવેલા બારાડી પેટ્રોલ પંપ પાસે આ ઘટના ઘટી હતી. એક બેફામ ગતિએ દોડતા ટ્રકના ચાલકે સ્ટેયરિંગ પરથી કાબૂ ગુમાવ્યો હતો અને રસ્તા પર જતા તથા ઊભેલા 5થી વધુ વાહનોને પાછળથી ધડાધડ ટક્કર મારી દીધી હતી. આ અકસ્માતમાં એક બાઈક સવાર યુવાન ટ્રકની અડફેટે આવી જતાં તેને ગંભીર ઈજાઓ થઈ હતી. સ્થાનિક લોકોએ તાત્કાલિક લોહીલુહાણ હાલતમાં તેને સારવાર અર્થે નજીકની હોસ્પિટલમાં ખસેડ્યો હતો. આ અકસ્માત એટલો જોરદાર હતો કે ભોગ બનેલા વાહનોના કુરચા બોલી ગયા હતા.

પોલીસ કાફલો ઘટનાસ્થળે

અકસ્માતને પગલે ઠેબા ચોકડી હાઈવે પર વાહનોની લાંબી કતારો લાગી ગઈ હતી અને વાહનચાલકો મધરાતે કલાકો સુધી અટવાયા હતા. ઘટનાની જાણ થતાં જ સિટી-એ ડિવિઝન પોલીસની ટીમ કાફલા સાથે ઘટનાસ્થળે દોડી આવી હતી. પોલીસે ભારે જહેમત બાદ અકસ્માતગ્રસ્ત વાહનોને રસ્તા પરથી હટાવી ટ્રાફિક હળવો કરાવ્યો હતો અને પરિસ્થિતિ કાબૂમાં લીધી હતી.

આરોપી ટ્રકચાલક ઝડપાયો

મળતી માહિતી મુજબ, અકસ્માત સર્જીને ભાગવાનો પ્રયાસ કરી રહેલા કાળમુખા ટ્રકના ચાલકને પોલીસે ઝડપી પાડ્યો છે અને તેની સામે ગુનો નોંધી કાયદેસરની કાર્યવાહી હાથ ધરી છે.

ઉલ્લેખનીય છે કે, જામનગરની ઠેબા ચોકડી હવે વાહનચાલકો માટે 'મોતનો કૂવો' સાબિત થઈ રહી છે. અહીં અવારનવાર જીવલેણ અને ગંભીર અકસ્માતો થતા હોવા છતાં તંત્ર દ્વારા કોઈ નક્કર પગલાં લેવાયા નથી. આ અકસ્માત બાદ સ્થાનિકો અને વાહનચાલકોમાં તંત્ર સામે ભારે રોષ જોવા મળી રહ્યો છે. લોકો અહીં સ્પીડ બ્રેકર મૂકવા, પ્રોપર સાઈન બોર્ડ લગાવવા અને ટ્રાફિક વ્યવસ્થામાં કાયમી સુધારો કરવાની માંગ કરી રહ્યા છે.