ભારતમાલા હાઇવે પર સ્કોર્પિયો આગળ જતી ટ્રકની સાથે અથડાતા યુવાનનું મોત

વડોદરા, તા.30 ભારતમાલા એક્સપ્રેસ હાઇવે પર મળસ્કે  એક સ્કોર્પિયો ગાડી આગળ જતી ટ્રક સાથે અથડાતા રાજસ્થાન વતનમાં જતા મુંબઇના કન્સ્ટ્રક્શનના કામ સાથે જોડાયેલા યુવાનનું કરૃણ મોત નિપજ્યું હતું.

રાજસ્થાનના બિકાનેર જિલ્લાના જસરાસર તાલુકાના લાલમદેરારબડા ગામમાં રહેતા ત્રિલોકચંદ તોલારામ ગોદારાએ તાલુકા પોલીસ સ્ટેશનમાં નોંધાવેલી ફરિયાદમાં જણાવ્યું છે કે મારો ભાઇ શ્રવણ મુંબઇમાં રહેતો હતો અને કન્સ્ટ્રક્શનનું કામ કરતો હતો. તેને બે વર્ષ પહેલા મારી માતાના નામે સ્કોર્પિયો ખરીદી  હતી. તા.૨૮ના રોજ તેણે મને ફોન કરીને જણાવેલ કે હું એકલો સ્કોર્પિયો લઇને ઘેર આવવા નીકળું છું.

દરમિયાન તા.૨૯ની સવારે મારી માતાએ મને શ્રવણ કેટલે પહોંચ્યો તેમ પૂછવાનું કહ્યું અને મેં તેને ફોન લગાવતા એક વ્યક્તિએ ફોન ઉચક્યો હતો અને પોતે એમ્બ્યૂલન્સનો કર્મચારી છે, શ્રવણને અકસ્માત થયો છે જેથી તેને પાદરા સરકારી હોસ્પિટલમાં લઇ જઇએ છે તેમ જણાવ્યું હતું. બાદમાં હું તેમજ અન્ય લોકો વડોદરા આવ્યા હતા ત્યારે હોસ્પિટલમાં મારો ભાઇ મૃત્યુ પામ્યો  હોવાનું જણાયું હતું. પોલીસ દ્વારા જાણવા મળ્યું હતું કે ભારતમાલા એક્સપ્રેસ હાઇવે પર ભરૃચથી વડોદરાના ટ્રેક પર લક્ષ્મીપુરા ગામ પાસે સ્કોર્પિયો આગળ જતી ટ્રક સાથે અથડાતા અકસ્માત થયો  હતો. આ ઘટના અંગે તાલુકા પોલીસે કાયદેસરની કાર્યવાહી હાથ ધરી છે. ઉલ્લેખનીય છે કે મૃતક શ્રવણને એક વર્ષની નાની પુત્રી છે.