Vadodara : ચાલુ નાણાકીય વર્ષ 2025-26નો 31, માર્ચ અંતિમ દિવસ છે. જેથી અગત્યના સરકારી બીલો, ચેકો સહિતના ખર્ચ સરળતાથી પડી શકે તથા છેલ્લી તારીખોમાં મંજુર થઈ આવતી ગ્રાંટ લેપ્સ જવાનો પ્રશ્ન ઉદભવે નહી, તેવા હેતુથી જિલ્લા કલેકટર, વડોદરા દ્વારા ગુજરાત તિજોરી નિયમ-2000ના નિયમ-305 હેઠળ મળેલ સત્તા મુજબ સ્ટેટ બેંક ઓફ ઈન્ડીયા, માંડવી શાખા, વડોદરા તેમજ વડોદરા જિલ્લાની તમામ સ્ટેટ બેંક ઓફ ઈન્ડીયાની શાખા તથા જિલ્લા તિજોરી કચેરી, વડોદરા તથા તમામ પેટા તિજોરી કચેરીઓ અને સરકારી બીલો/ચેકની લેવડ-દેવડ કરતી બેંકોને તા.31, માર્ચે સરકારી બીલો/ચેકોની લેવડ–દેવડનું કામકાજ રાત્રીના 12 વાગ્યા સુધી ચાલુ રાખવા તથા આ હુકમનો સબંધકર્તાઓએ ચુસ્તપણે અમલ કરવા જણાવાયું છે.
દરમિયાન વડોદરા શહેર જિલ્લાની તમામ પોસ્ટ ઓફિસો તા.31મીએ નિયત સમય દરમિયાન ચાલુ રહેશે જ્યારે બીજા દિવસે એટલે કે નાણાકીય વર્ષના પ્રથમ દિવસે તા.1 અને 2, એપ્રિલ, 2026ના રોજ પોસ્ટ ઓફિસમાં પબ્લિક ડીલિંગનું કોઈ કામકાજ થશે નહીં પરંતુ ઇન્ટરેસ્ટ કેલ્ક્યુલેશન બાબતે પોસ્ટ ઓફિસનો તમામ સ્ટાફ કામ કરશે. જ્યારે તા. 3, શુક્રવારે ગુડ ફ્રાઇડેની જાહેર રજા છે. જો કોઈ ટેકનીકલ ખામી સર્જાય અને કોમ્પ્યુટર બંધ રહે તો તા.4 શનિવારે પબ્લિક વર્ક બંધ રહી શકે. આવી જ રીતે તા. 5, એપ્રિલે રવિવારે પોસ્ટ ઓફિસોમાં રજા રહેશે. જેથી પોસ્ટ ઓફિસના તા.6ઠ્ઠીએ પેન્શન મળી શકશે.
