Ahmedabad News: અમદાવાદ શહેરના નિકોલ વિસ્તારમાં આવેલા જાણીતા 'અભૂષણ ગોલ્ડ એન્ડ સિલ્વર' શોરૂમમાં છેલ્લા 11 મહિનાથી માર્કેટિંગ એક્ઝિક્યુટિવ તરીકે ફરજ બજાવતી મહિલા કર્મચારી 1.2 કિલોથી વધુના સોનાના દાગીના ચોરીને રફુચક્કર થઈ ગઈ હોવાની ઘટના સામે આવી છે. શોરૂમ માલિકે નોંધાવેલી ફરિયાદ મુજબ, ચોરી થયેલા મુદ્દામાલની કિંમત અંદાજે 1.11 કરોડથી પણ વધુ છે.
માલિક જમવા ગયા ને મહિલાએ ખેલ પાડ્યો
નિકોલમાં અનમોલ સર્કલ પાસે ગ્રેવિટી શોપિંગ મોલમાં આવેલા આ શોરૂમના માલિક દર્શનભાઈ જૈને નોંધાવેલી ફરિયાદ મુજબ, શનિવારે(9) બપોરે 2 વાગ્યે તેઓ જમવા માટે ઘરે ગયા હતા. આ દરમિયાન શોરૂમમાં મેનેજર અને અન્ય 19 જેટલા કર્મચારીઓ હાજર હતા. સાંજે 5 વાગ્યે જ્યારે માલિક પરત આવ્યા ત્યારે સ્ટાફે અમુક દાગીના ગાયબ હોવાની જાણ કરી હતી.
સીસીટીવી ફૂટેજમાં ભાંડો ફૂટ્યો
તપાસ દરમિયાન જાણવા મળ્યું કે, સેલ્સગર્લ તરીકે કામ કરતી હર્ષિદાબહેન રાજેન્દ્રભાઈ હટ્ટી કોઈને કહ્યા વગર શોરૂમમાંથી નીકળી ગઈ હતી અને તેનો ફોન પણ સ્વિચ ઓફ આવતો હતો. શોરૂમના સીસીટીવી ફૂટેજ ચેક કરતા પોલીસ પણ ચોંકી ઉઠી હતી. વીડિયોમાં હર્ષિદાબહેન પોતાની પાછળ રહેલા કબાટમાંથી સોનાના ઘરેણાં કાઢીને પોતાના કપડાંના ગજવામાં છુપાવતા સ્પષ્ટ દેખાઈ હતી. ત્યારબાદ તે ઉપરના માળે સ્ટોરરૂમમાં જઈ પોતાની બેગ લઈને શોરૂમની બહાર નીકળી ગઈ હતી.
1.2 કિલો સોનું અને કરોડોની મત્તા સાફ
શોરૂમ મેનેજમેન્ટ દ્વારા કરવામાં આવેલી સ્ટોક વેરિફિકેશનમાં કુલ 1,211.991 ગ્રામ સોનું ઓછું મળ્યું હતું. ચોરાયેલા ઘરેણાંમાં સોનાની ચેઈન, વીંટી અને બંગડીઓ, મંગળસૂત્ર અને પેન્ડન્ટ, સોનાની ઘડિયાળ અને અન્ય કિંમતી ઘરેણાં મળી કુલ 1.11 કરોડથી વધુના દાગીના ચોરીને ફરાર થઈ ગઈ હતી.
નિકોલ પોલીસ દ્વારા તપાસનો ધમધમાટ શરૂ
નિકોલ પોલીસે હર્ષિદાબહેન વિરુદ્ધ ચોરી અને વિશ્વાસઘાતનો ગુનો નોંધી વધુ તપાસ હાથ ધરી છે. આરોપી મહિલા હાલ ફરાર છે, જેને પકડવા માટે પોલીસે અલગ-અલગ ટીમો બનાવી તેના સંભવિત રહેઠાણો પર દરોડા પાડવાનું શરૂ કર્યું છે. શોરૂમ જેવી સુરક્ષિત જગ્યાએ આટલી મોટી ચોરી થતા અન્ય વેપારીઓમાં પણ ફફડાટ વ્યાપી ગયો છે.
