અમદાવાદ, મંગળવાર
સાયબર ગઠિયા લોકોને છેતરવા માટે અવનવી યુક્તિઓ અપનાવી રહ્યા છે. શાહઆલમમાં મેડીકલનો વ્યવસાય કરતા વેપારીએ બધા દેશની ચેનલો મફતમાંક જોવા માટે એપ્લિકેશન ડાઉનલોડ કરી હતી. એપ ડાઉનલોડ થતાંની સાથે તેમને ફોન હેક કરીને સાયબર ગઠિયાએ કુલ રૃા. ૧.૩૭ લાખ એકાઉન્ટમાંથી ટ્રાન્સફર કરી લીધા હતા. પોલીસ તપાસમાં ફેસબુકમાં રીલ્સ જોઇને તેમને એપ્લિકેશન ડાઉનલોડ કરી હતી. આ બનાવ અંગે ઇસનપુર પોલીસે ગુનો નોંધી વધુ તપાસ હાથ ધરી છે.
સાયબર ગઠિયાએ વધુ રૃપિયા ઉપાડવા પ્રયત્ન કર્યો પણ વેપારીએ એપ્લિકેશ ડીલીટ કરતાં બીજા રૃપિયા બચી ગયાઃઇસનપુર પોલીસે ગુનો નોંધી તપાસ શરુ કરી
શાહઆલમમાં રહેતા અને મેડિકલની દુકાન ધરાવી ધંધો કતા યુવકે ઇસનપુર પોલીસ સ્ટેશનમાં અજાણી વ્યક્તિ સામે ફરિયાદ નોંધાવી છે કે તા.૦૧-૦૪-૨૬ના રોજ સવારે તે ફેસબુક જોતા હતા ત્યારે એક ટીવી વર્લ્ડ નામની એપ્લીકેશન જોઇ હતી. તેમાં ફ્રીમાં બધા દેશની ચેનલો જોવા મળશે તેવું લખેલ હતું. જેથી તે વેપારીએ એપ્લિકેશન ડાઉનલોડ કરી હતી. બાદમાં બીજા દિવસે તે એપ્લિકેશન ચાલુ કરતા મોબાઇલ ફોન હેક થઇ ગયો હતો. બાદમાં તેમના એકાઉન્ટમાંથી ટુકડે-ટુકડે કુલ રૃા. ૧.૩૭ લાખ કપાઇ ગયાના મેસેજ આવ્યા હતા. જેથી તાત્કાલિક એપ્લીકેશન ડીલીટ કરીને સાયબર ક્રાઇમમાં ૧૯૩૦માં ફોન કરીને ફરિયાદ કરી હતી.
