દેણા ચોકડી પાસે દિલ્હી પબ્લિક સ્કૂલનો ખાળકૂવો ઉભરાતા રહીશો પરેશાન

શહેરની દેણા ચોકડી પાસે આવેલી દિલ્હી પબ્લિક સ્કૂલના ખાળકૂવો ઉભરાતા દૂષિત પાણીના કારણે છેલ્લા એક મહિનાથી આસપાસના રહીશો ભારે હાલાકીનો સામનો કરી રહ્યા છે. સ્થાનિક રહીશો અને મ્યુ. કાઉન્સિલરની રજૂઆત બાદ મ્યુ. કોર્પોરેશન હરકતમાં આવ્યું છે અને સ્કૂલ સંચાલકોને ત્રણ દિવસમાં સમસ્યાનો ઉકેલ લાવવા માટે નોટિસ પાઠવી છે.

હરણી -દેણા રોડ પર દેણા ચોકડી કેનાલ પાસે આવેલી દિલ્હી પબ્લિક સ્કૂલના કેમ્પસમાં આવેલ ખાળકૂવો સતત ઉભરાઈ રહ્યો હતો. સ્કૂલ સંચાલકો દ્વારા ગ્લોબલ ડિસ્કવરી શાળા તરફની દીવાલમાં બાકોરું પાડી આ દૂષિત પાણી ખુલ્લા ખેતરમાં છોડાતું હતું, જેના કારણે ખેતરમાં પાણી ભરાઈ રહેતું અને આસપાસના વિસ્તારમાં તીવ્ર દુર્ગંધ ફેલાતી હતી. ઉપરાંત મચ્છર અને જીવજંતુઓનો ઉપદ્રવ પણ વધ્યો હતો. ખેતર માલિકે સ્કૂલ સંચાલકોને અનેક વખત રજૂઆત કર્યા છતાં કોઈ પગલા લેવામાં આવ્યા ન હતા.

સિદ્ધાર્થ સ્ક્વેર, સિદ્ધાર્થ લાઈફસ્ટાઇલ, ઓમ રેસિડન્સી સહિતની નજીકની સોસાયટીઓના રહીશો દ્વારા મ્યુ. કોર્પોરેશનને લેખિત રજૂઆત કરવામાં આવી હતી. સ્થળ પર તપાસ કરવા પહોંચેલા અધિકારીઓએ સ્કૂલ સંચાલકોને મૌખિક સૂચના આપી હતી છતાં મિલન જળ છોડવાની પ્રક્રિયા ચાલુજ રહી હતી. અંતે મ્યુ. કોર્પોરેશનના ઉત્તર ઝોન, વોર્ડ નં. ૩ની કચેરી દ્વારા દિલ્હી પબ્લિક સ્કૂલને નોટિસ પાઠવી જણાવાયું છે ક, ત્રણ દિવસમાં ખાળકૂવો ખાલી કરી દૂષિત પાણી બહાર છોડવાનું તાત્કાલિક બંધ કરવામાં આવે, નહિંતર મ્યુ. કોર્પોરેશન તરફથી પગલા લેવામાં આવશે.