ભાવવધારા વચ્ચે કોમર્શિયલ ગેસનો સપ્લાય અટકાવાતા હજારો કારખાનાઓ પર તોળાતું સંકટ

Rajkot News : ઓઈલ કંપનીઓએ કોમર્શિયલ ગેસ સિલિન્ડરના ભાવમાં રૂ. 114 નો તોતિંગ વધારો ઝીંકવાની સાથે ડિસ્ટ્રીબ્યુટર્સ પાસેથી મળતી માહિતી મુજબ ચાર દિવસથી તેનો સપ્લાય પણ અટકાવી દેવામાં આવતા અને કોમર્શિયલ બાટલાના બુકિંગની ડિલિવરી હોલ્ડ પર રાખી દેવાતા રાજકોટના હજારો કારખાના-ઉદ્યોગો પર સંકટના વાદળો ઘેરાયા છે.

ડોમેસ્ટિક માટે જ સપ્લાયનો પરિપત્ર

એજન્સીઓએ બુકિંગ હોલ્ડ પર રાખી દીધા, રાજકોટની ઔદ્યોગિક વસાહતોમાં ચિંતા વધી ગઇ છે. એક તરફ વર્ષે 50 હજાર કરોડનું ટર્નઓવર અને આશરે 15 હજાર કરોડની નિકાસ કરતા મોરબીના 700 સિરામિક ઇન્ડસ્ટ્રીઝ ગેસના અભાવે ટપોટપ બંધ થવા લાગ્યા છે, ત્યારે રાજકોટમાં શાપર વેરાવળ, મેટોડા, આજી સહિત ઔદ્યોગિક વસાહતોમાં તેમજ શહેરમાં હોટલ-રેસ્ટોરન્ટ, રબ્બર, સોના-ચાંદી સહિત મેટલ ગાળવા સહિત અનેકવિધ ઔદ્યોગિક પ્રવૃત્તિમાં વપરાતા કોમર્શિયલ ગેસ સિલિન્ડરની ડિલિવરી હાલ અટકી જતા ઉદ્યોગકારોમાં ચિંતાના વાદળો ઘેરાયા છે અને આ અંગે ધારાસભ્યોએ પણ નારાજગી વ્યક્ત કરીને સરકારમાં રજૂઆતની તૈયારીઓ શરૂ કરી છે.

આ પણ વાંચો : ઈરાન યુદ્ધ હજુ 7 દિવસ ચાલશે તો દુનિયામાં મહામંદી સર્જાશે! 16 દેશોને અસર થવાનો દાવો

એલપીજીને માત્ર ઘરેલુ વપરાશ માટે સપ્લાય કરાશે

ગેસ એજન્સીઓના સૂત્રો અનુસાર કેન્દ્ર સરકાર તમામ ઓઈલ માર્કેટિંગ કંપનીઓ જે એલ.પી.જી. મેળવે તે માત્ર ઘરેલું વપરાશ માટે સપ્લાય કરવા જણાવાયું છે. ઉપરાંત ગત ચાર દિવસથી કોમર્શિયલ ગેસની ડિલિવરી એજન્સીઓને મળતી બંધ થઈ છે જેના પગલે કોમર્શિયલ ગેસના જથ્થાબંધ બુકિંગ અન્વયે વિતરકો દ્વારા ડિલિવરી હાલ સ્થગિત કરી દેવાઈ છે. રાજકોટ અને આસપાસના વિસ્તારમાં અંદાજે 10 હજાર નાના-મોટા યુનિટો ગેસનો વપરાશ કરે છે. શહેરમાં આશરે 3500 થી વધુ કોમર્શિયલ ગેસ બાટલાના ગ્રાહકો છે.

કોમર્શિયલ ગેસમાં સપ્તાહમાં બીજી વાર ભાવ વધારો

કોમર્શિયલ ગેસ સિલિન્ડરના બાટલાના ભાવ ગત ફેબ્રુઆરી-26 ના અંતમાં રૂ. 1732.50 હતો. આ ભાવમાં તા. 1 માર્ચે રૂટીનમાં દર મહિને રિવાઇઝ થતા ભાવ મુજબ રૂ. 27 વધારીને રૂ. 1760.50નો ભાવ થયો હતો. હવે યુદ્ધના પગલે એક સાથે રૂ. 114 નો વધારો ઝીંકી દેવાયો છે, આમ સપ્તાહમાં બીજી વાર ભાવ વધારાયો છે અને બાટલાનો ભાવ રૂ. 1874.50 એ પહોંચી ગયો છે.

ઉદ્યોગોને 75 ટકા ગેસ વાપરવા છૂટ આપવા ધારાસભ્યની રજૂઆત

અબજો રૂપિયાના વાઇબ્રન્ટ કરાર થયા તે રાજકોટમાં ગેસની શોર્ટ સપ્લાયથી ખુદ ભાજપના નેતાઓમાં પણ ચિંતા જાગી છે. રાજકોટ દક્ષિણના ધારાસભ્યએ ગુજરાત ગેસ કંપની દ્વારા પૂરા પડાતા પી.એન.જી. (PNG) ગેસની વપરાશની મર્યાદા 50 ટકા કરાઈ છે તે 75 ટકા કરવા તેમજ એક્સેસ ગેસની ગણતરી આખા મહિનાની સરેરાશ મુજબ કરવા સરકારને રજૂઆત કરી છે. કાસ્ટિંગ અને હીટ ટ્રીટમેન્ટ જેવી સતત પ્રક્રિયા ધરાવતા ઉદ્યોગોને ગેસની સતત ઉપલબ્ધિ અનિવાર્ય છે.