વડોદરાના કારેલીબાગમાં મુખ્ય માર્ગ પર ભુવો પડ્યો, બાઈકચાલકનો આબાદ બચાવ

Vadodara Potholes : વડોદરા શહેરના કારેલીબાગ વિસ્તારમાં જીવન ભારતી ચાર રસ્તા નજીક આવેલી મેન્ટલ હોસ્પિટલ પાસે મુખ્ય માર્ગ પર અચાનક ભુવો પડતા વાહનચાલકો અટવાયા હતા. 

અંદાજે સાત ફૂટ પહોળો અને સાત ફૂટ જેટલો ઊંડો ભુવો પડ્યો હોવાનું જણાય છે. ઘટનાસ્થળ વ્યસ્ત માર્ગ પર હોવાને કારણે અકસ્માત સર્જાય તેવી ભીતિ ઉભી થઈ હતી. સુરક્ષાના ભાગરૂપે સ્થાનિક ફેરીયાઓએ તાત્કાલિક ફ્રુટના કેરેટ મૂકી વાહનચાલકોને સાવચેત કરવાનો પ્રયાસ કર્યો હતો.

 કારચાલક ઐયુબ શેખે જણાવ્યું હતું કે, મારી આગળ પસાર થતા એક બાઈકચાલકનો ભુવાના કારણે માંડ બચાવ થયો હતો. 

ઘટનાની જાણ થતાં વડોદરા મ્યુનિસિપલ કોર્પોરેશનના કર્મચારીઓ સ્થળ પર દોડી ગયા હતા. કર્મચારીઓએ ભુવાના આસપાસ બેરીકેડ મૂકી વિસ્તારને કોર્ડન કરી સુરક્ષાની કાર્યવાહી હાથ ધરી હતી.

ઉલ્લેખનીય છે કે, ચોમાસા પૂર્વે જ શહેરમાં વિવિધ વિસ્તારોમાં ભુવા પડવાની ઘટનાઓ સામે આવી રહી છે. “વરસાદ પહેલાં જ રસ્તાઓની હાલત ખાડે ગઈ” જેવી સ્થિતિ વચ્ચે શહેરમાં વગર ચોમાસે ભુવા પડવાનો સિલસિલો યથાવત રહેતા લોકોમાં તંત્ર સામે રોષ જોવા મળી રહ્યો છે.