પંચમહાલના મોરવાહડફની સરકારી હોસ્પિટલમાં જળબંબાકાર, દર્દીઓ અને સ્ટાફ પરેશાન

Panchmahal News : પંચમહાલ જિલ્લાના મોરવાહડફમાં ભારે વરસાદને કારણે જનજીવન પ્રભાવિત થયું છે. સતત વરસતા વરસાદના પરિણામે મોરવાહડફનું મુખ્ય તળાવ ઓવરફ્લો થયું છે, જેના કારણે સબ ડિસ્ટ્રિક્ટ હોસ્પિટલના કમ્પાઉન્ડમાં ઘૂંટણ સુધીના પાણી ભરાયા છે. આ પરિસ્થિતિને લીધે હોસ્પિટલમાં આવતા દર્દીઓ અને સ્ટાફને ભારે હાલાકીનો સામનો કરવો પડી રહ્યો છે. 

પાણી ભરાવાથી દર્દીઓની મુશ્કેલી વધી

મોરવાહડફની આ સરકારી હોસ્પિટલમાં દરરોજ 200થી વધુ દર્દીઓ સારવાર માટે આવે છે. હોસ્પિટલના કમ્પાઉન્ડમાં પાણી ભરાઈ જવાથી અંદર જવું કે બહાર નીકળવું મુશ્કેલ બન્યું છે. દર્દીઓ અને તેમના સગાં-સંબંધીઓએ આ પાણીમાંથી પસાર થવું પડે છે, જેનાથી તેમને ભારે હાલાકી વેઠવાનો વારો આવ્યો છે.

હોસ્પિટલમાં ફરજ બજાવતા સ્ટાફને પણ આ પાણી ભરાવાને કારણે મુશ્કેલીઓ પડી રહી છે. કમ્પાઉન્ડમાં પાણી ભરાયેલા હોવાથી તેમની દૈનિક કામગીરી અને અવરજવર પર અસર પડી છે.

લોકો દ્વારા તંત્ર પાસે ઉકેલની માંગ

હોસ્પિટલના કમ્પાઉન્ડમાં ભરાયેલા પાણીનો આજદિન સુધી કોઈ નિકાલ થયો નથી, જેના કારણે આ સમસ્યા યથાવત છે. દર્દીઓ અને સ્થાનિક લોકોની માંગ છે કે તંત્ર દ્વારા આ બાબતે તાત્કાલિક ધ્યાન આપી પાણીના નિકાલ માટે યોગ્ય ઉકેલ લાવવામાં આવે, જેથી દર્દીઓ અને સ્ટાફની મુશ્કેલીઓ ઓછી થઈ શકે.