વડોદરામાં ફાયર બ્રિગેડ વિભાગમાં કોન્ટ્રાક્ટ ડ્રાઇવરોનો ઇજારો વધુ 3 મહિના લંબાવવાની દરખાસ્તથી વિવાદ

Vadodara Fire Brigade : વડોદરા કોર્પોરેશનના ફાયર વિભાગમાં એમ્બ્યુલન્સ, ડેડ બોડી વાન, પાણીના ટેન્કરો સહિતની આવશ્યક સેવાઓ માટે કાર્યરત કોન્ટ્રાક્ટ ડ્રાઇવરોનો ઇજારો વધુ ત્રણ મહિના લંબાવવા દરખાસ્ત રજૂ થતા વિવાદ સર્જાયો છે. નવી ટેન્ડર પ્રક્રિયાનું બહાનું બતાવી હાલની એજન્સીની સેવાઓ 31 ઓગસ્ટ સુધી ચાલુ રાખવા જણાવ્યું છે.

ફાયર વિભાગ દ્વારા વર્ષ 2022માં મહેસાણાની અલ્ટ્રા મોડલ એજન્સીને પ્રતિદિન આઠ કલાકના ધોરણે 108 ડ્રાઇવરો ઉપલબ્ધ કરાવવાનો ઇજારો આપવામાં આવ્યો હતો. આ ડ્રાઇવરો એમ્બ્યુલન્સ, ડેડ બોડી વાન, પાણીના ટેન્કરો સહિતની વિવિધ સેવાઓમાં ફરજ બજાવી રહ્યા છે.

ફાયર વિભાગમાં કાયમી ફાયર ડ્રાઇવરની મંજૂર મહેકમ 144ની સામે હાલમાં માત્ર ત્રણ ફાયર ડ્રાઇવર જ ઉપલબ્ધ છે. તેવી જ રીતે 16 એમ્બ્યુલન્સ ડ્રાઇવરની મંજૂર મહેકમ સામે માત્ર એક જ કાયમી એમ્બ્યુલન્સ ડ્રાઇવર કાર્યરત છે. પરિણામે વિભાગની કામગીરી મોટા પ્રમાણમાં કોન્ટ્રાક્ટ આધારિત ડ્રાઇવરો પર નિર્ભર બની છે. હાલમાં એજન્સી મારફતે 141 ડ્રાઇવરો સેવા આપી રહ્યા છે.

દરમિયાન ફાયર વિભાગના ફાયર ઓફિસરો અને વિભાગીય વડા સસ્પેન્ડ હોવાથી નવી ટેન્ડર પ્રક્રિયા સમયસર પૂર્ણ થઈ શકી નથી. આ સંજોગોમાં અગાઉ શરૂ કરાયેલી ટેન્ડર પ્રક્રિયાની ફાઇલ બંધ કરી નવેસરથી ઇજારો આપવા પ્રક્રિયા હાથ ધરવામાં આવી છે. 

નવી ટેન્ડર પ્રક્રિયા પૂર્ણ ન થાય ત્યાં સુધી સેવા વ્યવસ્થામાં કોઈ વિક્ષેપ ન સર્જાય તે માટે અલ્ટ્રા મોડલ એજન્સીનો 108 અથવા જરૂરિયાત મુજબના મેનપાવરનો ઇજારો વધુ ત્રણ મહિના એટલે કે 31 ઓગસ્ટ, 2026 સુધી લંબાવવા માટેની દરખાસ્ત સ્થાયી સમિતિ સમક્ષ રજૂ કરવામાં આવી છે.