મહાપાલિકાની સાધારણ સભામાં કંસારા પ્રોજેકટ સહિતના પ્રશ્નો વિપક્ષ ઉઠાવશે

- કાલે ભાવનગર મહાપાલિકાની સાધારણ સભા મળશે 

- આઉટ સોર્સીંગ કર્મચારી, પેવર રોડ અને પેવિંગ બ્લોક વગેરે પ્રશ્ને વિપક્ષ કોંગ્રેસ શાસક ભાજપને ઘેરશે 

મહાપાલિકાના હોલ ખાતે આગામી ગુરૂવારે સાંજે ૪ કલાકે મેયરના અધ્યક્ષ સ્થાને સાધારણ સભા મળશે. સાધારણ સભામાં પ્રશ્નોત્તરીકાળ દરમિયાન વિપક્ષ કોંગ્રેસના નગરસેવકો ત્રણ સવાલ ઉઠાવવાના છે, જેમાં ભાવનગર શહેરમાં કાર્યરત કંસારા નદી સજીવીકરણના પ્રોજેકટનું કામ હાલ કયા સ્ટેજે છે તેમજ આ પ્રોજેકટ અંતર્ગત ફેઈઝ-ર નું કામ હાલ કયા સ્ટેજે છે ?. મહાપાલિકામાં હાલ આઉટ સોર્સીંગનો કોન્ટ્રાક્ટ કઈ એજન્સીને આપવામાં આવેલ છે, આઉટ સોર્સીંગ કામગીરી માટે કયા કયા હોદ્દા નક્કી કરવામાં આવેલ છે, આઉટ સોર્સીંગથી વિવિધ વિભાગોમાં કુલ કેટલા કર્મચારીઓ કયા કયા હોદ્દા પર ફરજ બજાવી રહ્યા છે ?. મહાપાલિકામાં કોની માંગણીથી કે સૂચનાથી આરસીસી., પેવર રોડ અને પેવિંગ બ્લોક નાખવાનું આયોજન કરવામાં આવે છે, કયાં કામગીરી કરવામાં આવી છે, કેટલો ખર્ચ થયો છે, પેવિંગ બ્લોક સારા હોય છતાં પેવર અથવા આરસીસી રોડ બનાવવામાં આવ્યા છે, જેમાં ગેરેન્ટી પીરીયડવાળા કેટલા ? વગેરે માહિતી માંગવામાં આવશે. 

મહાપાલિકાની સાધારણ સભામાં વિપક્ષ કોંગ્રેસ પ્રશ્ન પુછી અધિકારી પાસે જવાબ માંગશે. આ જવાબમાં મહાપાલિકા અને ભાજપની પોલ ખુલશે તેમ જણાય રહ્યુ છે. સાધારણ સભામાં ભાજપ-કોંગ્રેસના નગરસેવકો અને મહાપાલિકાના અધિકારીઓ હાજર રહેશે. 

મહાપાલિકાની સાધારણ સભામાં 11 ઠરાવને મંજૂરી અપાશે 

ભાવનગર મહાપાલિકાની સાધારણ સભામાં જુદા જુદા કામના ૧૧ ઠરાવને બહાલી આપવામાં આવશે, જેમાં એક કર્મચારીને આર્થિક સહાય આપવી, ૯ રહેણાંકીય લીઝપટ્ટાની મુદ્દત રીન્યુઅલ કરવી, ફિકસ પગારના કર્મચારીઓને નિમણુંક તારીખથી ૧ર વર્ષ પુરા થયેથી પ્રથમ ઉચ્ચતર પગાર ધોરણ આપવુ વગેરે ઠરાવ અંગે ચર્ચા કરાશે અને ત્યારબાદ યોગ્ય ઠરાવને મંજૂરી અપાશે.