વડોદરા,એસ.એસ.જી. હોસ્પિટલમાં બિનજરૃરી ભીડ ટાળવા તથા ગંદકી ફેલાતી અટકાવવા માટે આર.એમ.ઓ.દ્વારા સિક્યુરિટી ગાર્ડને ચેકિંગ કરવા માટે સૂચના આપવામાં આવી છે.
સયાજી હોસ્પિટલમાં રોજ મોટી સંખ્યામા દર્દીઓ સારવાર માટે આવે છે. તાત્કાલિક સારવાર વિભાગમાં જ્યારે કોઈ દર્દીને લાવવામાં આવે છે, ત્યારે તેની સાથે આખો પરિવાર અથવા મિત્રોનું ટોળું અંદર આવી જતું હોય છે. આ ભીડને કારણે ફરજ પરના ડોક્ટર અને નસગ સ્ટાફને મુસીબતનો સામનો કરવો પડે છે. બિનજરૃરી ભીડને કારણે અન્ય દર્દીઓને પણ હાલાકી ભોગવવી પડે છે. આર.એમ.ઓ. દ્વારા સિક્યુરિટી ગાર્ડને સૂચના આપી દર્દી સાથે માત્ર એક જ સગાને એન્ટ્રી આપવાની તાકીદ કરવામાં આવી છે. તદુપરાંત તમાકુની પ્રોડક્ટ લઈને આવતા કેટલાક દર્દીના સગાઓ દ્વારા ગંદકી પણ કરવામાં આવતી હોય છે. હવે સિક્યુરિટી ગાર્ડ દ્વારા દરેક વ્યક્તિનું ચેકિંગ કરી આવી વસ્તુઓ જપ્ત કરી તેનો નાશ કરવામાં આવશે.
