જામનગરના માર્કેટ યાર્ડ રોડ પર મોડી રાતે કારમાં ઈંગ્લિશ દારૂની હેરાફેરી પકડાઈ : 1824 નંગ ઈંગ્લિશ દારૂની બોટલોનો સાથે બે આરોપીઓની અટકાયત

Jamnagar Police : જામનગરના હાપા માર્કેટીંગ યાર્ડ રોડ પર ગઈરાત્રે પોલીસે પૂર્વ બાતમીના આધારે ગોઠવેલી વોચમાં એક મોટરમાંથી ઈંગ્લિશ દારૂના 1824 ચપલા ઝડપાયા છે. આ મોટરનો પીછો કરી ધુંવાવની ગોળાઈ સુધી ધસી ગયેલી પોલીસે બે શખ્સની ધરપકડ કરી છે. જ્યારે ધ્રોલમાં એક મકાનમાંથી ઈંગ્લીશ દારૂની 65 બોટલ મળી આવી છે.

જામનગરના હાપા માર્કેટીંગ યાર્ડ રોડ પર એક મોટરમાં ઈંગ્લિશ દારૂની હેરાફેરી થઈ રહી હોવાની બાતમી મળતા પીઆઈની સૂચનાથી ગઈરાત્રે તે રોડ પર પોલીસે વોચ ગોઠવી હતી. જે વોચ દરમિયાન યાર્ડ નજીક નવા બનાવવામાં આવેલા રસ્તા પરથી જીજે-3-જેસી 5615 નંબરની મોટર દોડી જતી જોવા મળી હતી. તે મોટરને પોલીસે ધુંવાવની ગોળાઈ પાસે ફિલ્મી ઢબે રોકાવી તેની તલાશી લેતાં ભારતીય બનાવટના 1824 ચપલા મળી આવ્યા હતા. રૂ.4,67,040 ની કિંમતના ચપલા તથા રૂ.5 લાખની મોટર અને એક મોબાઈલ સાથે પોલીસે રણજીતસાગર રોડ પર વસવાટ કરતા દીપક જમનાદાસ જેઠવાણી ઉર્ફે અટાપટુ તેમજ દિગ્વીજય પ્લોટ-54 માં વિશ્રામ વાડી ચોકમાં રહેતા જીજ્ઞેશ વિનોદભાઈ ખીચડા નામના બે શખ્સની ધરપકડ કરી છે. 

ઉપરાંત દારૂનો બીજો દરોડો ધ્રોલમાં પાડવામાં આવ્યો હતો. જામનગર જિલ્લાના ધ્રોલમાં રહેતા ઇમરાન ઉર્ફે મોન્ટી સિરાજભાઈ રફાઈના મકાનમાં દારૂ હોવાની બાતમીના આધારે સ્થાનિક પોલીસે ગઈ કાલે સાંજે દરોડો પાડયો હતો. આ સમયે તેના મકાનમાંથી રૂપિયા 71,500 ની કિંમતની 65 નંગ દારૂની બોટલોનો જથ્થો મળી આવ્યો હતો. જેને પોલીસે કબજે કર્યો છે. જ્યારે દરોડા સમયે આરોપી હાજર મળી આવ્યો ન હતો. આથી પોલીસે તેને ફરાર જાહેર કરી તેની શોધખોળ હાથ ધરી છે.