શિનોર, વડોદરા તા.૨૩ વડોદરા જિલ્લામાં શિનોર તાલુકાના સતીસણા ગામે ચાર વર્ષની બાળકીની કરપીણ હત્યા કરનાર કુંટુંબી કાકાને સાથે લઇને તપાસ માટે જિલ્લા એલસીબીની ટીમ નીકળી હતી ત્યારે હત્યા કરનાર યુવાને એલસીબીના પીએસઆઇની સર્વિસ રિવોલ્વર આંચકી બે રાઉન્ડ ફાયર કરતા એક ગોળી ગાડીના કાચને ચીરીને આરપાર નીકળી ગઇ હતી જ્યારે એક ગોળી પોલીસ સાથેની ઝપાઝપી દરમિયાન તેના પગમાં વાગી હતી.
પ્રાપ્ત માહિતી મુજબ સતીસણા ગામમાં ગત અઠવાડિયે ચાર વર્ષની બાળકીની હત્યાના ગુનામાં ઝડપાયેલા આરોપી અજય લક્ષ્મણભાઇ રાઠોડિયા (રહે.ડેંગલ ફળિયું, સતીસણા)ની વધુ તપાસ માટે પોલીસે કોર્ટમાં રજૂ કરી રિમાન્ડ મેળવ્યા હતાં અને કાલે તેના રિમાન્ડ પૂરા થવાના હતાં. દરમિયાન તેને તપાસ માટે નીકળેલી એલસીબી પોલીસ દ્વારા સેગવા આઉટપોસ્ટથી શિનોર પોલીસ સ્ટેશન સાંજે સરકારી ગાડીમાં લઈ જવામાં આવી રહ્યો હતો.
સરકારી ગાડીમાં તેને વચ્ચેની સીટ પર બેસાડી તેની આજુબાજુ બે પોલીસ જવાનો બેઠા હતા જ્યારે આગળની સીટ પર પીએસઆઇ એસ.જે. રાઠવા બેઠા હતા અને ડ્રાઇવર ગાડી ચલાવતો હતો. દરમિયાન સેગવાથી શિનોર જવાના માર્ગ પર સીમળી ગામ નજીક પોલીસ વાહન ચાલું હતું ત્યારે અજયે આગળ બેઠેલ પીએસઆઇની સર્વિસ રિવોલ્વર આચાનક ઝૂંટવી લીધી હતી અને તેને એક રાઉન્ડ ફાયર કરતા ગોળી ડ્રાઇવર સાઇડના કાચને વિંધીને આરપાર નીકળી ગઇ હતી.
આ વખતે સાથેના બે પોલીસ જવાનોએ તેના હાથમાંથી રિવોલ્વર ખૂંચવવાનો પ્રયાસ કરતા તેને ફરી એક રાઉન્ડ ફાયર કર્યુ હતું જો કે તે ગોળી તેના પગની ટચલી આંગળીમાં જ વાગી હતી. ઘટનાની જાણ થતાં જ સમગ્ર જિલ્લા પોલીસ તંત્ર તાત્કાલિક હરકતમાં આવ્યું હતું. ઈજાગ્રસ્ત આરોપીને સારવાર માટે મોટા ફોફળિયા સ્થિત સામૂહિક આરોગ્ય કેન્દ્ર ખાતે ખસેડવામાં આવ્યો છે. હોસ્પિટલ બહાર ચુસ્ત પોલીસ બંદોબસ્ત ગોઠવવામાં આવ્યો છે.
એક ગોળી ડ્રાઇવરના માથા પરથી નીકળી કાચની આરપાર ગઇ
સતીસણા ગામની બાળકીની કરપીણ હત્યા કરનાર અજય રાઠોડિયાને જિલ્લા એલસીબીની ટીમ આજે સાંજે સેગવાથી શિનોર લોકઅપમાં લઇ જતી હતી ત્યારે પીએસઆઇની રિવોલ્વર આંચકી તેણે કરેલા ફાયરિંગમાં પ્રથમ રાઉન્ડ કરતા ગોળી ડ્રાઇવરના માથા ઉપરથી જ નીકળી ગઇ હતી. સદનસીબે ડ્રાઇવરના માથામાં ગોળી વાગી ન હતી. આ સાથે જ તેના બંદોબસ્તમાં રહેતા એલસીબીના પોલીસ જવાનોએ તેને કાબૂમાં લેવાનો પ્રયાસ કર્યો પરંતુ તેને ફરી બીજુ ફાયરિંગ કર્યું હતું.
બાળકી સાથે શારીરિક અડપલાના પોઝિટિવ રિપોર્ટના ભયે કૃત્ય કર્યુ હોવાની આશંકા
શિનોર તાલુકાના સતીસણા ગામે રાત્રે ખાટલામાં ઊંઘતી ચાર વર્ષની બાળકીનું અપહરણ કરી તેની હત્યા કર્યા બાદ લાશને કોથળામાં નાંખી કેનાલમાં ફેૅકી દીધી હતી. પોલીસે લાશને શોધી કાઢ્યા બાદ અજય રાઠોડિયાની ધરપકડ કરી હતી. મૃતક બાળકીની માતા સાથે આરોપીને આડા સંબંધો હોવા ઉપરાંત તેની દાનત પણ સારી નહી હોવાથી બાળકી સાથે તેને કોઇ છેડછાડ કરી છે કે નહી તે જાણવા માટે પોલીસે ડોક્ટરનો અભિપ્રાય માંગ્યો હતો. આ અભિપ્રાય પોઝિટિવ આવશે તેવો ભય હોવાથી અજયે પોલીસને ટાર્ગેટ કરી હોવાનું મનાય છે.
