વડોદરાના બાપોદ પોલીસ સ્ટેશનની બહાર જ વેપારી પર ટોળાનો હુમલો

Vadodara Crime : વડોદરાના આજવારોડ પર જ્વેલરી શોપની બહાર ફિટ કરેલા સીસીટીવી કેમેરા હટાવવાના મુદ્દે દુકાનદાર ભાઇઓ પર નજીકની સોસાયટીના રહીશો તથા અન્યએ હુમલો કર્યો હતો. જે અંગે બાપોદ પોલીસે ગુનો દાખલ કર્યો છે.

આજવારોડ સયાજીપુરા ગામ નવી નગરી ફળિયામાં રહેતા સુનિલભાઇ ભેરૂલાલ મેવાડાની શ્રી હરિ ટાઉનશિપમાં દેવનારાયણ જ્વેલર્સ નામની દુકાન છે. બાપોદ પોલીસ સ્ટેશનમાં તેમણે ફરિયાદ નોંધાવી જણાવ્યું છે કે, ગત 20 મી તારીખે રાત્રે હું તથા મારો ભાઇ જીતેન્દ્ર મેવાડા દુકાને હતા. તે દરમિયાન શ્રી હરિ ટાઉનશિપમાં રહેતા યતીન પરમાર તથા અન્ય લોકો આવ્યા હતા. તેઓએ મારા ભાઇને જણાવ્યું કે, તમારી દુકાનના સીસીટીવી કેમેરામાં અમારી સોસાયટી દેખાતી હોઇ હટાવી લો. મારા ભાઇએ કેમેરા હટાવવાની ના પાડતા યતીને મારા ભાઇને મારવાની ધમકી આપી હતી. દરમિયાન કોઇએ પોલીસને કોલ કરતા પોલીસની ગાડી આવી ગઇ હતી. હું પોલીસ વાનમાં બેસીને પોલીસ સ્ટેશન આવી ગયો હતો. મારો ભાઇ જીતેન્દ્ર બાઇક લઇને પાછળ આવતો હતો. એકતાનગર ચાર રસ્તા પાસે આરોપીઓએ મારા ભાઇને ઉભો રાખી હુમલો કર્યો હતો. મારો ભાઇ ત્યાંથી નીકળીને પોલીસ સ્ટેશન આવી ગયો હતો. હું પોલીસ સ્ટેશનની બહાર ઉભો હતો. ત્યારે આરોપીઓ ધસી આવ્યા હતા. તેઓએ મારા પર હુમલો કરતા મને માથામાં ઇજા થઇ હતી. પોલીસે આ અંગે યતીન પરમાર, યશ, અનિલ, અક્ષય, મામા કહીને ઓળખાતા શખ્સ, નિલેષ, મેહુલ તથા કેરી સામે ગુનો દાખલ કરી કાયદેસરની કાર્યવાહી હાથ ધરી છે. આરોપીઓએ મારી દુકાનના શટર પર પણ પથ્થરમારો કર્યો હતો.