ગુજરાતના અર્થતંત્રમાં ઈરાન યુદ્ધથી ગાબડું, 2000 કરોડનો ફટકો, LPG માટે લાઈનો યથાવત્

Middle East War Hits Gujarat Industries: મિડલ ઈસ્ટમાં છેડાયેલા ઈરાન-ઈઝરાયલ યુદ્ધના એક મહિના બાદ સમગ્ર સૌરાષ્ટ્રનું ઔદ્યોગિક અને વ્યાપારિક માળખું વેરવિખેર થઈ ગયું છે. 28મી ફેબ્રુઆરીએ શરૂ થયેલા યુદ્ધની આડમાં સ્થાનિક સ્તરે ફૂલેલી-ફાલેલી સંગ્રહખોરી, અફવાખોરી અને વહીવટી તંત્રની ઘોર નિષ્ક્રિયતાને કારણે સામાન્ય જનતા અને ઉદ્યોગકારોની હાલત કફોડી બની છે. રાજકોટના એન્જિનિયરિંગથી લઈને મોરબીના સિરામિક અને જામનગરના બ્રાસ ઉદ્યોગ સુધી દરેક સ્તરે યુદ્ધની આંચ અનુભવાઈ રહી છે. પરિણામે એકંદરે  2000 કરોડ રૂપિયાનો ફટકો લાગ્યો છે.

3000થી વધુ ઔદ્યોગિક એકમોને તાળાં લાગ્યા

ખાસ કરીને રાજકોટ, મોરબી, જામનગર જિલ્લામાં 3000થી વધુ ઔદ્યોગિક એકમોને તાળાં લાગ્યા છે. જેના પગલે 5 લાખથી વધુ શ્રમિકોના ચૂલા ઠરતા વતન તરફ પ્રયાણ કરી ગયા છે. સૌથી વધુ રાંધણ ગેસની અછતમાં 6000થી વધુ હોટલો, રેસ્ટોરન્ટ, કેટરર્સ, મેસ, લારી-ગલ્લાના ખાણીપીણીના ધંધા-વ્યવસાય ભૂંજાયા છે. ગેસ સિલિન્ડરોના કાળાબજારે મધ્યમવર્ગનું બજેટ તોડી નાખ્યું છે.

હાલ પણ 900 રૂપિયાનો ગેસ બાટલો કાળાબજારમાં 1500 રૂપિયાએ પહોંચ્યો છે તો કોમર્શિયલનો ભાવ  3000 રૂપિયાને ઓળંગ્યો છે. ઈરાન યુદ્ધના કારણે ખાસ કરીને એલપીજી ઉપરાંત પ્રોપેન અને નેચરલ ગેસના પુરવઠામાં વિક્ષેપ પડતા મોરબી-રાજકોટના સિરામિક ઉદ્યોગથી લઈને સ્થાનિક હોટલ-રેસ્ટોરન્ટ અને સામાન્ય ગૃહિણીઓના બજેટ પર આ યુદ્ધની ‘આંચ’ આવી છે. ગેસ અને ઈંધણના ભાવમાં થયેલા તોતિંગ વધારાને પગલે સૌરાષ્ટ્રના મેન્યુફેક્ચરિંગ સેક્ટરમાં સોંપો પડી ગયો છે. માત્ર એન્જિનિયરિંગ અને ઓટો પાર્ટ્સના 50 હજાર  એકમોમાં કાચા માલના અભાવે 30 ટકા ઉત્પાદન કાપ મુકાયો છે. જો યુદ્ધ હજુ વધુ સમય ચાલશે તો સૌરાષ્ટ્રના એમ.એસ.એમ.ઈ. ઉદ્યોગોમાં મોટાપાયે છટણીથી લઈને તાળા લાગી જવાની ભીતિ છે.

https://www.gujaratsamachar.com/news/gujarat/conspiracy-to-insert-fake-notes-into-atm-cash-deposit-machines-30037192966.html

યુદ્ધને કારણે મિડલ ઈસ્ટમાંથી આવતા રાંધણ ગેસના પુરવઠા પર અસર પડતા સ્થાનિક બજારમાં અરાજકતા જોવા મળી રહી છે. એલપીજીની અછતની અફવાઓને કારણે લોકોએ ‘પેનિક બુકિંગ’ શરૂ કરતા એજન્સીઓ પર 10થી 15 દિવસનું વેઈટિંગ લિસ્ટ જોવા મળી રહ્યું છે. કોમર્શિયલ ગેસના ભાવવધારા અને અછતની સૌથી મોટી અસર ફૂડ બિઝનેસ પર પડી છે. રાજકોટ અને હાઈવે પરની અંદાજે 2500 થી 3000 હોટલ,રેસ્ટોરન્ટ અને મેસ જેવા ખાણીપીણી એકમો મુશ્કેલીમાં છે. 

નાના લારી-ગલ્લા ધારકોને દૈનિક કમાણીમાં 40 ટકાનો ઘટાડો

લગ્નસરાની સીઝન ચાલતી હોવા છતાં, કેટરિંગ કોન્ટ્રાક્ટરો ગેસ ન મળવાને કારણે જૂના ભાવે કામ કરવા તૈયાર નથી. આશરે 10 હજારથી વધુ નાના લારી-ગલ્લા ધારકોને દૈનિક કમાણીમાં 40 ટકાનો ઘટાડો થયો છે. ઘણી હોટલોએ હવે ગેસને બદલે ઈલેક્ટ્રિક ઈન્ડક્શન અથવા ફરીથી કોલસા-લાકડાના ચૂલા તરફ વળવાની ફરજ પડી છે. ગેસના બાટલા નહીં મળવાથી પેનિક ફેલાતા વ્યાપક ડિમાન્ડ નીકળવાથી ઈલેક્ટ્રિક ઈન્ડક્શનની પણ શોર્ટેજ જોવા મળી છે. એ તો ઠીક ગત સપ્તાહના આરંભે પેટ્રોલ ખાલી થઈ જવાની અફવાએ રાજકોટના 200થી વધુ પેટ્રોલ પંપો પર વાહનોની લાંબી કતારો લગાવી દીધી હતી.