મેઘરાજા ગુજરાતને ધમરોળશે, 10 જિલ્લામાં ઓરેન્જ તો એકમાં ભારે વરસાદનું રેડ એલર્ટ જાહેર

Gujarat Weather News : ગુજરાત હવામાન વિભાગની લેટેસ્ટ આગાહી અનુસાર આજે દક્ષિણ ભારતમાં મેઘરાજાની તોફાની સવારી નીકળવાના એંધાણ છે. 10 જિલ્લામાં ઓરેન્જ એલર્ટ તો એક જિલ્લામાં ભારે વરસાદનું ઓરેન્જ એલર્ટ જાહેર કરવામાં આવ્યું છે. આ આગાહી નાઉકાસ્ટ હેઠળ આગામી ત્રણ કલાક એટલે કે સવારના સાત વાગ્યાથી 10 વાગ્યા સુધી માટે કરવામાં આવી છે.

ક્યાં છે રેડ એલર્ટ?
વરસાદના રેડ એલર્ટની વાત કરીએ તો આજે વલસાડમાં ભારે વરસાદનું રેડ એલર્ટ જાહેર કરવામાં આવ્યું છે. જ્યારે કેન્દ્રશાસિત પ્રદેશ દમણમાં પણ ભારે વરસાદની આગાહી કરવામાં આવી છે. ત્યાં પણ રેડ એલર્ટ જાહેર કરાયું છે. ઉલ્લેખનીય છે કે ગઇકાલે નવસારીમાં સૌથી વધુ વરસાદ ખાબક્યો હતો. ગત રાત્રિ સુધીના લેટેસ્ટ અપડેટ પ્રમાણે નવસારીમાં કુલ 3.7 ઈંચ તો અમરેલીના સાવરકુંડલામાં 3.11 ઈંચ જેટલો વરસાદ ખાબક્યો હતો. જ્યારે વલસાડના ધરમપુરમાં પણ 2.76 ઈંચ વરસાદ ખાબક્યો હતો.

ક્યા ક્યા જિલ્લામાં ઓરેન્જ એલર્ટ?
આજે પોરબંદર, ગીર સોમનાથ, જૂનાગઢ, ભરુચ, નર્મદા, છોટા ઉદેપુર, સુરત, નવસારી, ડાંગ અને તાપી તથા કેન્દ્રશાસિત પ્રદેશ દાદરા નગર હવેલીમાં ભારે વરસાદનું ઓરેન્જ એલર્ટ જાહેર કરાયું છે. જ્યારે બીજી બાજુ અમરેલી, ભાવનગર, આણંદ, વડોદરા, પંચમહાલ તથા દાહોદ જિલ્લામાં વરસાદનું યલો એલર્ટ જાહેર કરાયું છે.