એસટી બસના ટાયર નીચે કચડાતા યુવકનું સ્થળ ઉપર મોત

અમદાવાદ,શુક્રવાર

પૂર્વ  વિસ્તારમાં બેફામ વાહનો હંકારવાના કારણે દિન પ્રતિદિન હિટ એન્ડ રન તથા અકસ્માતમાં મોતના બનાવોમાં ચિંતાનજક વધારો થઇ રહ્યો છે. આજે બપોરે ટ્રાફિકથી ધમધતા ખોખરા વિસ્તારમાં અનુપમ સિનેમા  એસ.ટી.બસના ટાયર નીચે કચડાતાં યુવકનું સ્થળ ઉપર મોત થયું  હતું. જેમાં યુવક ટુ-વ્હીલર સાથે રોડ ઉપર પડયો હતો. દરમિયાન  પૂરઝડપે આવી રહેલી એસ.ટી. બસ ડ્રાઇવરે બસ યુવક પર ચડાવી દેતા મોત થયું હતું. આ બનાવ અંગે ટ્રાફિક પોલીસે બસના ડ્રાઇવર સામે ગુનો નોંધીને યુવકે બ્રેક મારવાથી કે પછી બસની ટકકરથી મોત થયું તે નક્કી કરવા માટે સીસીટીવી ફૂટેજ આધારે વધુ તપાસ  હાથ ધરી છે.

ટ્રાફિક પોલીસે બસ ડ્રાઇવર સામે ગુનો નોંધી યુવકે અચાનક બ્રેક મારતા પડયો કે બસની ટક્કરથી પડયો તે નક્કી કરવા સીસીટીવી  ફૂટેજ આધારે તપાસ શરુ કરી

બહેરામપુરામાં રહેતો યુવક આજે બપોરે તેના મિત્ર  સાથે કામ માટે વિરાટનગર ટુ-વ્હીલર લઇને જતો હતો. દરમિયાન અમરાઇવાડી સૌજન્ય એપાર્ટમેન્ટ નજીક અનુપમ સિનેમા પાસેથી પસાર થતા હતા. આ સમયે અચાનક બ્રેક મારતા યુવકે બેલેન્સ ગુમાવતા રોડ ઉપર  બન્ને મિત્રો જમણી અને ડાભી સાઇડ પટકાયા હતા.

જ્યાં પૂરઝડપે આવી રહેલા એસટી બસના ડ્રાઇવરે બસ યુવક પર ચડાવી દેતા તેનુ માથું છુંદાઇ જતા  ઘટના સ્થળે મોત થયું હતું. આ અંગે ટ્રાફિક આઇ ડિવિઝન પોલીસે બસના ડ્રાઇવર સામે ગુનો નોંધીને યુવકે બ્રેક મારવાથી કે પછી બસની ટક્કરથી તે પડયો હતો તે નક્કી કરવા માટે પોલીસે સીસીટીવી ફૂટેજ મેળવીને વધુ તપાસ હાથ ધરી છે.