લોધિકાનાં PI અને 5 પોલીસમેનને સસ્પેન્ડ કરી દેવાયાં

ફાર્મ હાઉસમાંથી 11 લાખનો દારૂ પકડાયાના પડઘા : રાજકોટ રેન્જના ડીઆઇજીએ ફરજમાં બેદરકારી ગણી રાતોરાત સસ્પેન્ડ કરવાનો હુકમ કર્યો

રાજકોટ, : લોધિકાનાં માખાવડ ગામે આવેલા ફાર્મ હાઉસમાં બે દિવસ પહેલાં એસએમસીએ દરોડો પાડી રૂા. 11.16 લાખનો અંગ્રેજી દારૂ ઝડપી લીધો હતો. આ કેસમાં લોધિકાનાં PI એસ.એન. પરમાર અને અન્ય 5 પોલીસમેનને ડીઆઇજી નિર્લિપ્ત રાયે સસ્પેન્ડ કરી દેવાનો હુકમ કરતાં પોલીસ બેડામાં ફફડાટ વ્યાપી ગયો છે. 

આ સાથે જ પોલીસ તંત્રને સ્પષ્ટ સંદેશો અપાયો છે કે જો બહારની એજન્સી દારૂ, જુગાર અંગે દરોડા પાડશે તો સ્થાનિક પોલીસને પરિણામ ભોગવવા તૈયાર રહેવું પડશે. સામાન્ય રીતે આવા કિસ્સાઓમાં થોડાક દિવસો પછી સસ્પેન્શનના પગલાં લેવાય છે. ઘણીવાર તો કોઇ કાર્યવાહી પણ કરાતી નથી. પરંતુ આ કેસમાં ગઇકાલે રાત્રે જ સસ્પેન્શનનાં હુકમ કરાયાં હતા.  તાજેતરમાં પડધરીથી મુકાયેલા મહિલા પીઆઇ એસ.એન. પરમાર સાથે એએસઆઇ પિયુષ રામાણી, એએસઆઇ ગોપાલ ધાંધલ, હેડ કોન્સ્ટેબલ માવજીભાઇ ડાંગર, ખોડાભાઇ મકવાણા અને કોન્સ્ટેબલ પ્રકાશ પરમારને સસ્પેન્ડ કરાયા છે. હાલમાં ફરજમાં બેદરકારી ગણી સસ્પેન્ડ કરાયાં છે. બુટલેગરો સાથે મિલીભગત હતી કે કેમ તે અંગે પણ ઇન્કવાયરી કરાવાય તેવી સંભાવના છે.