વડોદરાના મોકસી ગામે શિકાર કરવા જતા દિપડો પાણીમાં ફસાયો, ઇજાગ્રત હાલતમાં રેસ્ક્યુ

Vadodara : વડોદરા જિલ્લાના ગ્રામ્ય વિસ્તારોમાં દીપડો અવારનવાર દેખાઈ રહ્યો છે અને શિકારની શોધમાં ગ્રામજનોના ઢોરવાડા સુધી આવીને પશુનું મારણ કરી જતો હોય છે. 

વડોદરા જિલ્લાના સાવલી તાલુકામાં છેલ્લા કેટલાક સમયથી ભાદરવા પંથકમાં દીપડો દેખાઈ રહ્યો હોવાથી ગ્રામજનોમાં ભયનો માહોલ છવાયો હતો. ખેડૂતો રાત્રિના સમયે ખેતરમાં જતા પણ ગભરાતા હતા અને દીપડાને પકડવા માટે ફોરેસ્ટ વિભાગને રજૂઆત કરતા પાંજરું પણ મૂકવામાં આવ્યું હતું. 

દરમિયાનમાં ભાદરવાના મોકસી ગામે દિપડો પાણીમાં ફસાયેલી હાલતમાં નજરે પડતા ગ્રામજનો ભેગા થઈ ગયા હતા અને ફોરેસ્ટ વિભાગને જાણ કરી હતી. ફોરેસ્ટની ટીમ દ્વારા બે કલાકની જહેમત બાદ દીપડાનું રેસક્યુ કરવામાં આવ્યું હતું. 

ફોરેસ્ટના રેસ્ક્યુઅર જીગ્નેશ પરમારે કહ્યું હતું કે, દિપડો પાણીમાં હોવાથી અને ઇજાગ્રસ્ત હાલતમાં હોવાને કારણે રેસ્ક્યુ કરવામાં અડચણ પડી હતી. પરંતુ જીવદયા કાર્યકરો અને ગ્રામજનોની મદદ મળતા સફળતાપૂર્વક દીપડાને બહાર કાઢવામાં આવ્યો હતો. તે ઇજાગ્રસ્ત હાલતમાં હોવાથી સારવાર આપવામાં આવી રહી છે.