Bomb Threat: ગુજરાતમાં ક્યારેક કચેરી કે એરપોર્ટ તો ક્યારેક શાળા અને કોર્ટને ધમકી ભર્યા મેઈલ મળી રહ્યા છે. ત્યારે હવે જૂનાગઢ શહેરની ડિસ્ટ્રિક્ટ એન્ડ સેસન્સ કોર્ટને બોમ્બથી ઉડાવી દેવાની ધમકી મળતા પોલીસ બેડામાં અફરાતફરી મચી ગઈ હતી. કોર્ટના સત્તાવાર ઈ મેઈલ પર મેઈલ આવ્યો હતો કે 2:10 વાગ્યે ત્રણ બોમ્બ કોર્ટમાં ફૂટશે. જેની જાણ તાત્કાલિક પોલીસ વિભાગને કરવામાં આવી હતી.
કોર્ટ પરિસર ખાલી કરાયું
જૂનાગઢ શહેરની ડિસ્ટ્રિક્ટ એન્ડ સેસન્સ કોર્ટમાં 2:10 વાગ્યે ત્રણ બોમ્બ ફૂટશે તેવો મેઈલ મળતા બોમ્બ ડિસ્પોઝલ સ્ક્વોડ (BDDS) અને ડોગ સ્ક્વોડનો કાફલો કોર્ટ પરિસરમાં દોડી આવ્યો હતો. તાત્કાલિક કોર્ટ પરિસરને ખાલી કરવામાં આવ્યું હતું, કોર્ટની દરેક જગ્યાએ બોમ્બ ડિસ્પોઝલ સ્ક્વોડ દ્વારા ચેકિંગ હાથ ધરવામાં આવ્યું હતું. જૂનાગઢ પોલીસની સાથે ફાયર બ્રિગેડની ટીમ પણ સુરક્ષાના ભાગ રૂપે ત્યાં પહોંચી હતી.
એન્ટ્રી અને એક્ઝિટ પોઈન્ટ સીલ
કોર્ટમાં કામકાજ માટે આવેલા વકીલો અને અસીલોમાં ધમકીના સમાચાર સાંભળતા જ થોડી ક્ષણ માટે ડરનો માહોલ ઊભો થયો હતો, કોર્ટ પરિસરમાં દોડધામના દ્રશ્યો સર્જાયા હતા. જો કે પોલીસે મામલાની ગંભીરતાને ધ્યાને લઈ સ્થિતિ પર કાબૂ મેળવી લીધો હતો. હાલ પોલીસે કોર્ટના તમામ એન્ટ્રી અને એક્ઝિટ પોઈન્ટ સીલ કરી દીધા છે. હજુ સુધી કોઈ શંકાસ્પદ વસ્તુ ધ્યાને આવી નથી.
રાજકોટ કલેક્ટર કચેરીને પણ મળી ધમકી
બીજી તરફ ગત 11 એપ્રિલ બાદ હવે ફરી રાજકોટ કલેક્ટર કચેરીને પણ બોમ્બથી ઉડાવી દેવાની ધમકી મળી હતી. ત્યાં પણ બૉમ્બ સ્ક્વોડ અને ડોગ સ્ક્વોડ દ્વારા તપાસ શરૂ કરવામાં આવી છે. જોકે બંને જગ્યાએ(જૂનાગઢ અને રાજકોટ)પોલીસે સધન તપાસ શરૂ કરી હતી પણ કોઈ શંકાસ્પદ વસ્તુ મળી આવી નથી.
સાયબર ક્રાઈમની ટીમે તપાસ તેજ કરી
ધમકીભર્યો મેઈલ કોણે કયા ઈરાદાથી મોકલ્યો છે તેની તપાસ માટે જૂનાગઢ સાયબર ક્રાઈમની ટીમ સક્રિય થઈ છે. એ દિશામાં તપાસ કરી રહી છે કે શું આ તમામ ઈમેલ કોઈ એક જ સોર્સ અથવા સર્વર પરથી મોકલવામાં આવ્યા છે? પ્રારંભિક દૃષ્ટિએ આ 'હોક્સ કોલ' (ખોટી ધમકી) હોવાનું જણાય છે, પરંતુ પોલીસ દળ કોઈ પણ પ્રકારનું જોખમ લેવા માંગતુ ન હોવાથી દરેક દિશામાં તપાસ આદરી છે.
આ પણ વાંચો: ગુજરાતના 8 જિલ્લામાં માવઠાંની આગાહી, પંચમહાલ-મહીસાગરમાં કમોસમી વરસાદથી ખેડૂતો ચિંતિત
ધમકીભર્યા મેલનો સિલસિલો યથાવત
ગુજરાતમાં આ પહેલા સરકારી કચેરીઓ,એરપોર્ટ,સ્કૂલો જેવા સ્થળોએ બોમ્બ કે આરડીએક્સ મૂકવામાં આવ્યા છે તેવી ધમકી આપતા મેઈલ અવારનવાર મળ્યા હતા. મેઈલ બોગસ હોવા છતાં પોલીસ દ્વારા ગંભીર નોંધ લઇને તપાસ કરવામાં આવતી હોય છે. ધમકીના મોટાભાગના મેલનું આઇપી એડ્રેસ વિદેશનું મળતું હોય છે. જેને કારણે પોલીસની તપાસમાં અળચણ આવતી હોય છે, ઘણી વખત માનસિક તણાવનો ભોગ બનેલા કે અસ્થિર દ્વારા પણ આવા ધમકીભર્યા મેઈલ મોકલવામાં આવતા હોય છે, છેલ્લે ધમકી આપનારાનો ઇરાદો માત્ર હેરાનગતિ કરવા સિવાય કોઇ નહીં હોવાનું ખૂલે છે. તપાસમાં કોઈ શંકાસ્પદ વસ્તુઓ મળતી નથી.
