વડોદરાઃ ગુજરાતમાં કચ્છ એવો પ્રદેશ છે જેણે સદીઓ જૂની પરંપરાગત હસ્તકલાઓને જાળવી રાખી છે.કચ્છની આવી ૧૨ હસ્તકલાઓનો ઉપયોગ એમ.એસ.યુનિવર્સિટીની હોમસાયન્સ ફેકલ્ટીના સંશોધકોએ ઘરનું ઈન્ટિરિયર ડિઝાઈન કરવામાં બખૂબીપૂર્વક કર્યો છે.જેની પાછળનો આશય આ હસ્તકલાઓને ભવિષ્યમાં પણ જીવંત રાખવાનો છે.
ઈન્ટિરિયર ડિઝાઈનિંગની વિદ્યાર્થિની શ્રુતિ ચૌધરી આ જ વિષય પર છેલ્લા ત્રણ વર્ષથી ગાઈડ અને ફેકલ્ટીના પ્રોફેસર ડો.સરજૂ પટેલના હાથ નીચે પીએચડી કરી રહી છે.આ દરમિયાન તેણે ક્ચ્છમાં વિવિધ હસ્તકલાઓના કારીગરોની મુલાકાત લઈને એક ડોક્યુમેન્ટરી પણ તૈયાર કરી છે.
શ્રુતિ ચૌધરી અને ડો.સરજૂ પટેલનું કહેવું છે કે, કેટલીક હસ્તકલાઓ તો હવે ગણ્યા ગાંઠયા પરિવારો સુધી જ સિમિત રહી છે.આ હસ્તકલાઓનો ઉપયોગ કરીને અમે ઘરનું વિવિધ ફર્નિચર અને બીજી વસ્તુઓ ડિઝાઈન કરી છે.જો આ પ્રકારનું ઈન્ટિરિયર લોકપ્રિય થાય તો આ કલાઓને પણ સ્વાભાવિક રીતે પ્રોત્સાહન મળી શકે છે.
ઉલ્લેખનીય છે કે, હોમસાયન્સ ફેકલ્ટીમાં ઈન્ટિરિયર ડિઝાઈનિંગનો અભ્યાસ કરતા બીએસસી અને એમએસસીના વિદ્યાર્થીઓના પ્રોજેકટસ અને તેમણે ડિઝાઈન કરેલી વસ્તુઓનું પ્રદર્શન યોજાયું હતું.જેમાં હસ્તકલાઓ આધારિત ફર્નિચર પણ પ્રદર્શિત કરાયું હતું.
કઈ હસ્તકલાઓનો ઉપયોગ
અજરખ, આભલા વર્ક, એપ્લિક વર્ક, બાટિક, બાંધણી, ગામઠી પ્રિન્ટ, મશરુ, મોતી ભરતકામ, લેકર લેથ વર્ક, લિપણ આર્ટ, પિઠોર પેઈન્ટિંગ, ટાંગલિયા
કયા પ્રકારનું ફર્નિચર ડિઝાઈન કર્યું
અરિસો, એસેસરી સ્ટેન્ડ, સિટિંગ, કી હોલ્ડર, સોફા આર્મ રેસ્ટ, ડેકોરેટિવ હેન્ગિંગ, ટેબલ લેમ્પ, વોલ ક્લોક, કોન્સોલર ટેબલ, ફાનસ, વોલફ્રેમ, સાઈડ ટેબલ, પાર્ટિશન, સ્ટૂલ, બૂક રિડિંગ સ્ટેન્ડ, કોફી ટેબલ, ટેબલ લેમ્પ, સાઈડ સ્ટૂલ, પ્લાન્ટર, કેન્ડલ હોલ્ડર, સેન્ટર ટેબલ, ચિલ્ડ્રન સ્ટૂલ, બાજઠ, પ્રસાદ થાળી, ડેકોરેટિવ પ્લેટ
