મ્યુનિ.પ્રેઝન્ટેશન તૈયાર કરવા પ્રતિ કલાક સાત હજાર ચૂકવશે

  અમદાવાદ,શુક્રવાર,27 માર્ચ, 2026

અમદાવાદ મ્યુનિસિપલ કોર્પોરેશનમાં ૨૩ હજારથી વધુ અધિકારીઓ અને કર્મચારીઓ ફરજ બજાવે છે. વર્ગ-૧થી ૩ના અધિકારીઓ મહિને બે લાખથી વધુ પગાર મેળવે છે.તેમની પાસેથી પ્રેઝન્ટેશન તૈયાર કરાવવાના બદલે ડાયરેકટર સ્પેશિયાલિસ્ટને પ્રતિ કલાક રુપિયા સાત હજાર સુધીની ફી ચૂકવવા સ્ટેન્ડિંગ કમિટીમાં દરખાસ્ત મંજુર કરવામા આવી છે.

એડમિનિસ્ટ્રેટર મુકેશકુમારની અધ્યક્ષતામા મળેલી સ્ટેન્ડિંગ કમિટીની બેઠકમાં શહેરમાં વધતા જતા ટ્રાફિકના ભારણની સાથે શહેરમાં જુદા જુદા રોડના ડેવલપમેન્ટ અને મેઈન્ટેનન્સના કામો માટે પ્રેઝન્ટેશન તૈયાર કરવા કોર્પોરેશનના જ ઈજનેર  ટ્રાફિક પ્રોજેકટ વિભાગ તરફથી મુકવામા આવેલી વિવાદાસ્પદ દરખાસ્ત મંજુર કરી છે.ટેકનીકલ ડાયાગ્રામ, વિઝયુઅલ વગેરે સાથે પ્રેઝન્ટેશન તૈયાર કરવા કન્સલ્ટન્ટ એચસીપી ડિઝાઈન એન્ડ પ્લાનિંગ પ્રા.લી.ની નિમણૂંક કરવામા આવી છે. આ ઉપરાંત ડાયરેકટર-સ્પેશિયાલિસ્ટને પ્રતિ કલાક રુપિયા સાત હજાર, સિનિયર લેવલ પ્રોફેસરને પ્રતિ કલાક રુપિયા ૪૪૦૦, મિડલ લેવલ પ્રોફેસરને પ્રતિ કલાક રુપિયા તથા જુનિયર લેવલ પ્રોફેસરને પ્રતિ કલાક રુપિયા ૨૦૦૦ ચૂકવવા વહીવટદાર તરફથી મંજુરી આપવામા આવી છે.