ગુજરાત માટે આગામી ત્રણ કલાક ભારે.... 19 જિલ્લામાં અતિ ભારે વરસાદનું રેડ એલર્ટ

Gujarat Weather Updates : ભારત સરકારના પૃથ્વી વિજ્ઞાન મંત્રાલય હેઠળના ભારતીય હવામાન વિભાગ (IMD), અમદાવાદ દ્વારા આજે સવારે 10:00 વાગ્યે જારી કરવામાં આવેલા તાજા નાઉકાસ્ટ બુલેટિન મુજબ, ગુજરાતના મોટાભાગના વિસ્તારોમાં મેઘરાજાએ ધમાકેદાર બેટિંગ શરૂ કરી છે. આગામી ત્રણ કલાક એટલે કે બપોરે 1:00 વાગ્યા સુધી રાજ્યના અનેક જિલ્લાઓમાં ભારેથી અતિભારે વરસાદ પડવાની પ્રબળ સંભાવના છે, જેને ધ્યાનમાં રાખીને તંત્ર દ્વારા રેડ અને ઓરેન્જ એલર્ટ જાહેર કરવામાં આવ્યું છે.

કયા કયા જિલ્લામાં રેડ એલર્ટ

હવામાન વિભાગની આગાહી મુજબ, રેડ એલર્ટ હેઠળ આવતા જિલ્લાઓમાં પ્રતિ કલાક 15 mm કે તેથી વધુ ધોધમાર વરસાદ વરસી શકે છે. આ સાથે જ 41 થી 61 કિમી પ્રતિ કલાકની ઝડપે તોફાની પવન ફૂંકાવાની અને મધ્યમથી ભારે ગાજવીજ સાથે જમીન પર વીજળી પડવાની 60 ટકાથી વધુ સંભાવના રહેલી છે. સાબરકાંઠા, ગાંધીનગર, અમદાવાદ, સુરેન્દ્રનગર, મોરબી, ભાવનગર, વડોદરા, આણંદ, ખેડા, અરવલ્લી, મહેસાણા, રાજકોટ, બોટાદ, અમરેલી, જૂનાગઢ, ગીર સોમનાથ, દીવ, જામનગર અને ભરૂચના નાગરિકોને અત્યંત સાવચેત રહેવા જણાવાયું છે.

કયા કયા જિલ્લામાં ઓરેન્જ એલર્ટ?

આ ઉપરાંત, બનાસકાંઠા, પાટણ, કચ્છ, દેવભૂમિ દ્વારકા, પોરબંદર, મહીસાગર, પંચમહાલ, દાહોદ, છોટા ઉદેપુર, નર્મદા, સુરત, તાપી, ડાંગ, નવસારી, વલસાડ, દમણ અને દાદરા તથા નગર હવેલી જિલ્લાઓમાં 5 થી 15 mm પ્રતિ કલાકના દરે મધ્યમ વરસાદ અને ગાજવીજ સાથે ઓરેન્જ એલર્ટ આપવામાં આવ્યું છે. આ વિસ્તારોમાં પણ 41 થી 61 કિમી પ્રતિ કલાકની ઝડપે પવન ફૂંકાઈ શકે છે અને વીજળી પડવાની 30 થી 60 ટકા સંભાવના છે.

હવામાન વિભાગ દ્વારા જારી કરાયેલા નિર્દેશો અનુસાર, રેડ અને ઓરેન્જ એલર્ટવાળા વિસ્તારોમાં ભારે પાણી ભરાવાની સમસ્યા, નીચાણવાળા વિસ્તારોમાં પૂર જેવી સ્થિતિ અને ટ્રાફિકજામ સર્જાઈ શકે છે. નાગરિકોને બિનજરૂરી મુસાફરી ટાળવા, જૂના કે જર્જરિત મકાનો તથા વૃક્ષોથી દૂર રહેવા અને વીજળીના કડાકા દરમિયાન સુરક્ષિત સ્થળે આશરો લેવા ખાસ અનુરોધ કરવામાં આવ્યો છે.