ગુજરાતના 3 જિલ્લામાં અઢીથી બે ઈંચ જેટલો વરસાદ ખાબક્યો, જાણો આજની લેટેસ્ટ આગાહી

Gujarat Rain: ગુજરાતમાં ચોમાસાના વિધિવત આગમન પહેલાં જ પ્રી-મોન્સૂન એક્ટિવિટીના ભાગરૂપે મેઘરાજાએ ધમાકેદાર બેટિંગ શરૂ કરી દીધી છે. રાજ્યના સ્ટેટ ઇમરજન્સી ઓપરેશન સેન્ટર (SEOC), ગાંધીનગર દ્વારા જાહેર કરાયેલા આંકડા મુજબ, 18મી જૂનના રોજ સવારે 6 વાગ્યાથી રાત્રે 10 વાગ્યા સુધીમાં રાજ્યના વિવિધ વિસ્તારોમાં નોંધપાત્ર વરસાદ નોંધાયો છે. જેમાં ખાસ કરીને ત્રણ જિલ્લાઓમાં 2 ઈંચથી લઈને પોણા 3 ઈંચ જેટલો વરસાદ ખાબકતા સ્થાનિક લોકોને ગરમીથી મોટી રાહત મળી છે.

બોટાદ, મહેસાણા અને ખેડામાં મેઘરાજાની તોફાની બેટિંગ

રાજ્યના 3 તાલુકાઓમાં અઢીથી બે ઈંચ જેટલો ભારે વરસાદ નોંધાયો છે. બોટાદ જિલ્લાના બરવાળા તાલુકામાં સૌથી વધુ 2.76 ઈંચ વરસાદ ખાબક્યો હતો. મહેસાણાના કડી તાલુકામાં 2.56 ઈંચ જેટલો વરસાદ નોંધાયો છે. જ્યારે ખેડાના નડિયાદમાં પણ મેઘરાજા મન મૂકીને વરસ્યા હતા. અહીં કૂલ 2.09 ઈંચ વરસાદ નોંધાયો છે. જ્યારે અમદાવાદ અને ગાંધીનગર જિલ્લાના વિસ્તારોમાં પણ વરસાદી માહોલ જામ્યો હતો. અમદાવાદ જિલ્લાના ધંધુકા તાલુકામાં 1.1ઈંચ, વિરમગામમાં 7 મીમી વરસાદ પડ્યો છે. બીજી તરફ, ગાંધીનગર જિલ્લાના કલોલ તાલુકામાં રાત્રિના સમયે વાજતે-ગાજતે 1.6 ઈંચ વરસાદ ખાબક્યો હતો.

હવામાન વિભાગની આગાહી

હવામાન વિભાગની આગાહી અનુસાર, 19 જૂનના રોજ બનાસકાંઠા, સાબરકાંઠા, મહેસાણા, અરવલ્લી, મહીસાગર, પંચમહાલ, દાહોદ, ખેડા, આણંદ, વડોદરા, છોટા ઉદેપુર, ભરૂચ, નર્મદા, સુરત, તાપી, નવસારી, ડાંગ, વલસાડ, ભાવનગર, અમરેલી, જૂનાગઢ, ગીર સોમનાથ જિલ્લાના છૂટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી છે.

છોટા ઉદેપુર વહેલી સવારથી વરસાદી માહોલ

છોટાઉદેપુર નગરમાં આજે (19મી જૂન) વહેલી સવારથી જ તેજ પવન સાથે ધીમીધારે વરસાદ શરૂ થઈ ગયો હતો. જ્યારે બોડેલી તાલુકામાં પણ વહેલી સવારથી જ વાતાવરણ પલટાયું હતું. બોડેલીના ગ્રામ્ય વિસ્તારો જેવા કે ચાચક, ઢોકલીયા, ઝાખરપુરા, માંકની, જબુગામ અને કકરોલિયા સહિતના તમામ વિસ્તારોમાં સાર્વત્રિક વરસાદ નોંધાયો છે. આ લાંબા સમય બાદ પડેલો વરસાદ ખેતીલાયક હોવાના કારણે જગતનો તાત (ખેડૂતો) અત્યંત ઉત્સાહમાં આવી ગયો છે.