વડોદરાઃ નવા શૈક્ષણિક વર્ષ પહેલા વાલીઓ અને વિદ્યાર્થીઓ પાઠય પુસ્તકો માટે હેરાન થઈ રહ્યા છે તો બીજી તરફ ગ્રાન્ટેડ સ્કૂલોમાં શિક્ષકોની ખાલી પડેલી જગ્યાઓ પર ૧૭૦ જેટલા જ્ઞાાન સહાયકોની નિમણૂકમાં પણ વિલંબ થઈ રહ્યો છે.
નવું શૈક્ષણિક વર્ષ શરુ થવાને હવે ગણતરીના કલાકો બાકી છે ત્યારે શહેર અને જિલ્લાની ગ્રાન્ટેડ સ્કૂલોમાં જ્ઞાાન સહાયકોની નિમણૂંક કરવા માટેની પ્રક્રિયા શરુ થઈ નથી.શિક્ષકોની ખાલી જગ્યાઓ પર પહેલા પ્રવાસી શિક્ષકોની નિમણૂંક થતી હતી.તેમને દરેક લેકચર દીઠ મહેનતાણું ચૂકવાતું હતું.તેની જગ્યાએ હવે સરકારે કોન્ટ્રાકટ આધારિત જ્ઞાાન સહાયકોની ૧૧ મહિના માટે નિમણૂક કરવાનું શરુ કર્યું છે.આ માટે માધ્યમિક વિભાગમાં દર મહિને ૨૪૦૦૦ રુપિયા અને ઉચ્ચતર માધ્યમિક વિભાગમાં ૨૬૦૦૦ રુપિયા વેતન ચૂકવવામાં આવે છે.
શહેર જિલ્લાની ગ્રાન્ટેડ સ્કૂલોમાં ૧૭૦ જગ્યાઓ પર જ્ઞાાન સહાયકોની નિમણૂક કરવી પડે તેમ છે.જોકે આ માટે હજી સુધી ગાંધીનગર ખાતેથી આદેશ મળ્યો નથી.ડીઈઓ કચેરીના સૂત્રોએ કહ્યું હતું કે, વડોદરા સહિત આખા રાજ્યમાં નિમણૂક બાકી છે અને આગામી સપ્તાહમાં શિક્ષણ વિભાગ પરિપત્ર કરે તેવી અપેક્ષા છે.
