ભારે પવન ફૂંકાતા ગુજરાતનો દરિયો તોફાની બનશે, માછીમારો અને બંદરો માટે ખાસ ચેતવણી જાહેર

IMD Issues Port Warning: ગુજરાતમાં સક્રિય બનેલી ચોમાસાની સિસ્ટમના કારણે સૌરાષ્ટ્ર અને દક્ષિણ ગુજરાતના જિલ્લામાં ભારેથી અતિભારે વરસાદ વરસી રહ્યો છે. હવામાન વિભાગ અનુસાર, 9 જુલાઈએ તાપી, નવસારી, ડાંગ અને વલસાડ જિલ્લામાં ભારે વરસાદને લઈને યલો એલર્ટ આપવામાં આવ્યું છે. આ દરમિયાન દરિયાકાંઠે ભારે પવન ફૂંકાવાની અને દરિયો તોફાની બનવાની પ્રબળ શક્યતાને લઈને માછીમારો અને બંદરો માટે ખાસ ચેતવણી જાહેર કરવામાં આવી છે.

માછીમારોને દરિયો ન ખેડવા સૂચન

હવામાન વિભાગ(IMD) દ્વારા આગામી દિવસોમાં પણ રાજ્યમાં ભારે વરસાદની આગાહી કરવામાં આવી છે. ખાસ કરીને દરિયામાં ઊંચા મોજા અને ભારે પવન ફૂંકાવાની શક્યતા હોવાથી માછીમારોને 8 જુલાઈથી 12 જુલાઈ સુધી દરિયો ન ખેડવા માટે કડક ચેતવણી આપવામાં આવી છે.

આ પણ વાંચો: 425 રસ્તાઓ બંધ, 11 ડેમ હાઈ-એલર્ટ પર, 7,500થી વધુ લોકોનું સ્થળાંતર, રાજ્યમાં 'ભારે' વરસાદથી જનજીવન અસ્તવ્યસ્ત

દક્ષિણ ગુજરાતના બંદરો પર 3 નંબરનું સિગ્નલ યથાવત

IMD અનુસાર, મજબૂત ચોમાસાની સ્થિતિને લીધે ગુજરાતના દરિયાકાંઠે અને તેની આસપાસના વિસ્તારોમાં તોફાની હવામાન પ્રવર્તે તેવી સંભાવના છે. આ પરિસ્થિતિને ધ્યાનમાં રાખીને હવામાન વિભાગે દક્ષિણ ગુજરાતના તમામ બંદરો માટે ખાસ પોર્ટ વોર્નિંગ જાહેર કરીને લોકલ કોશનરી સિગ્નલ નંબર-3 (LC-III) યથાવત રાખવાની સૂચના આપવામાં આવી છે. જ્યારે ઉત્તર ગુજરાતના બંદરો પરથી આ સિગ્નલ હટાવી લેવાનો આદેશ કરવામાં આવ્યો છે.