Local Body Election: ગુજરાતમાં આગામી સમયમાં યોજાનારી સ્થાનિક સ્વરાજની ચૂંટણીઓ પર કાયદાકીય ગ્રહણ લાગ્યું હોય તેમ જણાય છે. પાટીદાર અગ્રણી દિનેશ બાંભણિયા દ્વારા કરવામાં આવેલી જાહેર હિતની અરજી (PIL) પર આવતીકાલે, 10 એપ્રિલ 2026 ના રોજ સુપ્રીમ કોર્ટની ચીફ જસ્ટિસની બેન્ચ સમક્ષ મહત્વની સુનાવણી હાથ ધરવામાં આવશે. આ અરજીમાં રાજ્ય સરકારની 27% OBC અનામત નીતિને પડકારીને ચૂંટણી પ્રક્રિયા રોકવાની માંગ કરવામાં આવી છે.
રાજ્યમાં પંચાયતો, નગરપાલિકાઓ અને મહા નગરપાલિકામાં અપાયેલી 27% અનામત સામે પિટિશનમાં મુખ્યત્વે ત્રણ મુદ્દા ઉઠાવાયા છે:
1. ટ્રિપલ ટેસ્ટનું પાલન: સુપ્રીમ કોર્ટના અગાઉના નિર્દેશ મુજબ અનામત નક્કી કરતા પહેલા ટ્રિપલ ટેસ્ટના માપદંડોનું ચુસ્તપણે પાલન થયું છે કે નહીં તેની ચકાસણી.
2. 50% ની મર્યાદા: શું કુલ અનામત (SC/ST અને OBC મળીને) ૫૦% ની નિર્ધારિત મર્યાદા વટાવે છે?
3. ઝવેરી કમિશનનો અહેવાલ: જસ્ટિસ ઝવેરી કમિશનના રિપોર્ટના આધારે કરવામાં આવેલી બેઠકોની ફાળવણી કેટલી તર્કસંગત અને બંધારણીય છે તે અંગે પણ સવાલો ઉભા થયા છે.
આ પણ વાંચો :AAP સાથે છેડો ફાડનારા રાજુ કરપડા ભાજપમાં જોડાયા; કેમ ચર્ચામાં હતા આ નેતા
સુપ્રીમ સ્ટે આપે તો ચૂંટણી લંબાશે
રાજ્ય ચૂંટણી આયોગ દ્વારા એપ્રિલ 2026 ના અંતમાં 15 મહા નગરપાલિકાઓ સહિત અન્ય સંસ્થાઓની ચૂંટણી યોજવાની તૈયારીઓ શરૂ કરી દેવામાં આવી હતી. જોકે, અરજીમાં એવી દલીલ કરાઈ છે કે, જ્યાં સુધી અનામતની વિસંગતતા દૂર ન થાય ત્યાં સુધી ચૂંટણી અટકાવવી જોઈએ. જો આવતીકાલે સુપ્રીમ કોર્ટ આ મામલે સ્ટે (Stay) આપે છે, તો ચૂંટણી લાંબા સમય સુધી પાછી ઠેલાઈ શકે છે.
સુપ્રીમ કોર્ટના ચુકાદા પર નજર
(PESA) વિસ્તારોમાં આ અનામત હજુ પણ 10% રાખવામાં આવી છે. હવે સમગ્ર ગુજરાતની નજર સુપ્રીમ કોર્ટના ચુકાદા પર ટકેલી છે, જે રાજ્યના રાજકારણ અને સામાજિક સમીકરણો માટે અત્યંત નિર્ણાયક સાબિત થશે. હાલ તો તમામ પક્ષો અને વિવિધ સામાજિક સંગઠનોની નજર પણ સુપ્રીમ કોર્ટ પર ટકેલી છે. કારણ કે સુપ્રીમ કોર્ટનાં નિર્ણયથી સમગ્ર ચૂંટણીનું ગણિત પણ બદલી શકે છે.
