14 જિલ્લામાં અતિ ભારે વરસાદની આગાહી, 24 જિલ્લામાં યલો ઍલર્ટ, હવામાન વિભાગની લેટેસ્ટ અપડેટ

IMD Gujarat Forecast : ગુજરાતમાં ચોમાસાએ રૌદ્ર સ્વરૂપ ધારણ કર્યું છે. હવામાન વિભાગે રાજ્યના 14 જિલ્લાઓમાં રેડ ઍલર્ટ અને 24 જિલ્લાઓમાં યલો ઍલર્ટ જાહેર કર્યું છે. બપોરે 1 વાગ્યાથી 4 વાગ્યા સુધીના સમયગાળા માટે આ ઍલર્ટ જારી કરવામાં આવ્યું છે, જે દર્શાવે છે કે આગામી કલાકોમાં ભારે વરસાદની સંભાવના છે.

આગામી ત્રણ કલાક ગુજરાત માટે ભારે

હવામાન વિભાગની આગાહી મુજબ આજે બપોરે 1 વાગ્યાથી 4 વાગ્યા દરમિયાન આગામી ત્રણ કલાક ગુજરાત માટે અત્યંત મહત્ત્વપૂર્ણ છે, કારણ કે આ સમયગાળા દરમિયાન રાજ્યમાં સાર્વત્રિક અને ભારે વરસાદની સંભાવના છે.

સવારે 6થી 12 વાગ્યા સુધી વરસાદના આંકડા

આજે સવારે 6 વાગ્યાથી 12 વાગ્યા સુધીમાં રાજ્યના 110 તાલુકામાં વરસાદ નોંધાયો છે. આ સમયગાળા દરમિયાન 5 તાલુકામાં 5 ઇંચથી વધુ વરસાદ, 4 તાલુકામાં 4 ઇંચ કરતાં વધુ વરસાદ, 3 તાલુકામાં 3 ઇંચ કરતાં વધુ વરસાદ જ્યારે 12 તાલુકામાં 2 ઇંચ કરતાં વધુ વરસાદ સરકારી ચોપડે નોંધાયો છે. 

જૂનાગઢમાં મેઘમહેર

સૌથી વધુ વરસાદ જૂનાગઢ જિલ્લામાં નોંધાયો છે. જૂનાગઢના મેંદરડામાં માત્ર 6 કલાકમાં 12.55 ઇંચ વરસાદ નોંધાતા જળબંબાકારની સ્થિતિ સર્જાઈ છે. આ ઉપરાંત, જૂનાગઢના વંથલીમાં 9.80 ઇંચ અને કેશોદમાં 9.69 ઇંચ વરસાદ નોંધાયો છે. અન્ય તાલુકાઓમાં પણ ભારે વરસાદ નોંધાયો છે, જેમાં પોરબંદરના કુતિયાણામાં 5.31 ઇંચ અને ભાવનગરના મહુવામાં 5.31 ઇંચ વરસાદનો સમાવેશ થાય છે.

14 જિલ્લામાં રેડ ઍલર્ટ 

દેવભૂમિ દ્વારકા, જામનગર, પોરબંદર, રાજકોટ, જૂનાગઢ, ગીર સોમનાથ, અમરેલી, ભાવનગર, ભરુચ, સુરત, નવસારી, વલસાડ, દમણ અને દાદરા નગર હવેલી.

રાજ્યના તમામ જિલ્લામાં ઑરેન્જ ઍલર્ટ 

રાજકોટ, સુરેન્દ્રનગર, બોટાદ, ભરૂચ, તાપી, ડાંગ, કચ્છ, બનાસકાંઠા, પાટણ, અમદાવાદ, મહેસાણા, સાબરકાંઠા, ગાંધીનગર, અરવલ્લી, ખેડા, આણંદ, ભરુચ, વડોદરા, પંચમહાલ, દાહોદ, વડોદરા, છોટા ઉદેપુર અને નર્મદા.