બોટાદ પોલીસે મહેસાણાના પાંચ શખ્સોને ઝડપી લીધાં
લોકોને વધુ નફો કમાવવાની લાલચ આપી શેરમાર્કેટના નામે ટ્રાન્ઝેક્શન કરાવી છેતરપિંડી આચરતા હતા
બોટાદના ગઢડા રોડ પર હરીદર્શન કોમ્પ્લેક્સ સામે એક કારમાં સંજયજી દલાજી ઠાકોર (રહે.વડનગર, જી.મહેસાણા) તથા અન્ય માણસો મોબાઈલ ફોનના માધ્યમથી શેરબજારમાં વધારે નફો કમાવવાની ટીપ્સ આપી લોકો સાથે છેતરપિંડી આચરતા હોવાની બાતમીના આધારે બોટાદ ટાઉન પોલીસે તપાસ કરતા બાતમીવાળા સ્થળેથી જીજે-૦૨-ઈએન-૬૪૫૯ નંબરની કારમાં બેસેલા સંજયજી દલાજી ઠાકોર, વિપુલજી વિનુજી ઠાકોર (રહે.ગોથવા, તા.વિસનગર, જી.મહેસાણા), વિશાલજી સરદારજી ઠાકોર (રહે.છાબલીયા, તા.વડનગર, જી.મહેસાણા), રણજીતજી અરવિંદજી ઠાકોર (રહે.વડનગર) અને કિરણજી ઉમેદજી ઠાકોર (રહે.છાબલીયા, તા.વડનગર)ને ઝડપી લઈ બોટાદ પોલીસ મથકે લાવી પુછપરછ કરતા સંજયજી દલાજીએ જણાવ્યું હતું કે, તેઓ અલગ-અલગ મોબાઈલ ફોન તેમજ ડમી સીમકાર્ડથી શેરબજારમાં લીસ્ટીંગ થતાં શેરના ખરીદ-વેચાણ અંગેના બ્રોકરનું કોઈપણ પ્રકારનું લાઈસન્સ ધરાવતા નહી હોવા છતાં ગુનાહિત ષડયંત્ર રચી ઓનલાઈન પ્લેટફોર્મ પરથી લોકોના મોબાઈલ નંબર મેળવી વોટ્સએપ કોલ મારફત લોકોને માર્કેટ પલ્સ નામની એપ ઈન્સ્ટોલ કરાવી શરૂઆતમાં નફો કરાવી વધારે નફાની લાલચ આપી ગ્રાહકો પાસે શેરબજારના નામે ઓનલાઈન ટ્રાન્ઝેક્શન કરાવી પ્રારંભમાં નફો બતાવી બાદમાં રોકાણમાં નુકસાન થયું હોવાની ખોટી ફાઈલો મોકલી છેતરપિંડી વિશ્વાસઘાત કરતા હતા. જે બાદ આ મામલે બોટાદ ટાઉન પોલીસે પાંચેય શખ્સો સામે ગુનો નોંધી આગળની કાર્યવાહી હાથ ધરી છે.
જોખમ વધી ગયું હોવાથી બોટાદ આવ્યા હતા
પોલીસની પુછપરછમાં સંજયજી દલાજીએ જણાવ્યું હતું કે, તેઓ આ કામગીરી માત્ર વોટ્સએપ કોલ કે મેસેજ મારફતે જ કરતા હતા અને થોડાં દિવસોથી તેમની સાઈડ આ કામ કરવામાં જોખમ વધી ગયું હોવાનું તેમને લાગતા તેઓ તેમની સાથે કામ કરતા માણસો પૈકી ચારને લઈ બોટાદ આવ્યા હતા.
