વડોદરાઃ માંજલપુરની ટેન્સાઇલ સ્ટીલની અંદાજે રૃ.૩૦૦ કરોડની જમીન પડાવી લેવા માટે બોગસ લીઝ ડીડ બનાવી સરકારી વિભાગોમાં રજૂ કરવા અંગે ક્રાઇમ બ્રાન્ચમાં નોંધાયેલી ફરિયાદમાં સૂત્રધાર અમિત શાહ અને અમદાવાદના ભાવેશ અમીનનો હજી કોઇ પત્તો લાગ્યો નથી.જ્યારે બાકીના પાંચ આરોપીની ધરપકડ કરવામાં આવી છે.
ટેન્સાઇલ સ્ટીલ કંપનીમાં ૮૭ ટકા શેરનો હિસ્સો ધરાવતા સંજય પટેલે બોગસ લીઝ ડીડને આધારે રૃ.૧૦ કરોડ લઇ જમીન ભાડે આપી દેવાના કારસા અંગે ફરિયાદ નોંધાવતા પોલીસે ડીડ બનાવવા બદલ ટેન્સાઇલ કંપનીના પૂર્વ ડાયરેક્ટર અમિત મુકેશભાઇ શાહ,જમીન લીઝે લેનાર અમદાવાદના શ્રીમ કન્સ્ટ્રક્શનના ભાવેશ અમીન,ટેન્સાઇલના ડાયરેક્ટર કિશોર સુરતવાલા અને જમીનનો કબજો લેવા માણસો સાથે ધાક ધમકી આપનાર જૈમિન ગાંધી સહિત આઠ જણા સામે ગુનો નોંધ્યો હતો.
ઉપરોક્ત બનાવમાં ક્રાઇમ બ્રાન્ચે ગઇકાલે જ પાંચ આરોપીની ધરપકડ કરી હતી.જેમાં અમદાવાદની શ્રીમ કન્સ્ટ્રક્શનના માલિક ભાવેશ અમીન વતી લીઝ ડીડ પર સહી કરનાર(૧) ભુમિષ્ઠા મકવાણા(ક્રિષ્ણા એપાર્ટમેન્ટ,બહેરામપુરા,અમદાવાદ)(૨) ભાવેશ અમીન વતી જમીનનો કબજો લેવા ૨૦થી ૨૫ માણસો સાથે આવેલા જૈમિન ગાંધી (રામજી ખડકી,ભોજ ગામ,પાદરા, વડોદરા)(૩) સહીની ઓથોરિટી ધરાવતા ટેન્સાઇલ સ્ટીલના ડાયરેક્ટર કિશોર જગ જીવનદાસ સુરતવાલા(ક્રિષ્ણાવેલી ફ્લેટ્સ, કારેલીબાગ),(૪) સાક્ષી તરીકે સહી કરનાર નરેશ કંચનલાલ રાણા(ફતેગંજ, રાણાવાસ) અને(૫)મહેશ બાબુભાઇ પટેલ (ભોજગામ, પાદરા)નો સમાવેશ થાય છે.
આરોપીઓને કોર્ટમાં રજૂ કરી ૧૪ દિવસના રિમાન્ડની માગણી કરતાં કોર્ટે એક દિવસનો રિમાન્ડ આપ્યો હતો.જેથી આજે તમામને કોર્ટમાં રજૂ કરાતાં તેમને જેલમાં મોકલી આપવામાં આવ્યા છે.
ટેન્સાઇલ સ્ટીલના સરકારી રેકોર્ડ પર ડાયરેક્ટર કોણ,ક્યારે ઠરાવો થયા તેની તપાસ
ટેન્સાઇલ સ્ટીલની જમીનના કેસમાં બંને પક્ષે સામસામે આક્ષેપ-પ્રતિઆક્ષેપ કરવામાં આવી રહ્યા છે,જેથી પોલીસ સરકારી રેકોર્ડની વિગતો મેળવી રહી છે.
પોલીસે કહ્યું છે કે,ટેન્સાઇલ સ્ટીલમાં ડાયરેક્ટર તરીકે ખોટીરીતે પાવર આપ્યાનો તેમજ બોગસ લીઝ ડીડ બનાવી સરકારી વિભાગોમાં રજૂ કરવાના આરોપ છે.જેથી અમે તમામ વિભાગો પાસે કંપનીના રેકોર્ડ પરના ડાયરેક્ટર,ઠરાવો તેમજ બીજી માહિતી મેળવી પુરાવા એકત્રિત કરી રહ્યા છીએ.
નોંધનીય છે કે,આ કેસમાં હાઇકોર્ટના આદેશના ઉલ્લંઘનનો પણ પણ આરોપ કરાયો છે.જ્યારે,સામે પક્ષે પણ આવી જ રીતે પ્રતિ આરોપો કરતી અરજી પોલીસ કમિશનરને કરવામાં આવી છે.
