વડોદરામાં કોટાલી નજીક ફરાસખાનાના ગોડાઉનમાં તેમજ રતનપુરમાં ફેક્ટરીમાં આગ

Vadodara Fire : વડોદરામાં આગના જુદા-જુદા બે બનાવ બનતા ફાયર બ્રિગેડની મદદ લેવામાં આવી હતી. આ પૈકી ફરાસખાનાના ગોડાઉનની આગ કાબુમાં લેવા માટે ત્રણથી ચાર કલાકનો સમય લાગ્યો હતો.

વડોદરાના કોટાલી ગામ ખાતે આવેલા ફરાસખાનાના ગોડાઉનમાં ગઈકાલે રાત્રે કોઈ કારણસર આગ લાગી હતી. પવનનું જોર વધુ હોવાથી આગ બેકાબુ બની હતી અને ફરાસખાનાનો તમામ સામાન તેમાં લપેટાઈ ગયો હતો. વડોદરા ફાયર બ્રિગેડની મદદ લેવાતા પાંચ ટીમો ત્રણ કલાક સુધી કામે લાગી હતી અને ત્યારબાદ આગ પર કાબુ મેળવાયો હતો.

આગનો બીજો બનાવ વડોદરા નજીક રતનપુર ગામે બન્યો હતો. જેમાં પુઠા બનાવતી ફેક્ટરીમાં આગ લાગતા નાસભાગ મચી હતી. આગ વિકરાળ સ્વરૂપ લે તે પહેલા ફાયર બ્રિગેડ આગ કાબુમાં લેવામાં સફળતા મેળવી હતી. આગ લાગવાનું ચોક્કસ કારણ જાણવા મળ્યું નથી. આગના ઉપરોક્ત બંને બનાવોમાં કોઈ જાનહાનિ થઈ નથી તેમજ પોલીસે પણ વિગતો મેળવી હતી.