વડોદરામાં પોલીસની ઓળખાણ આપીને વેપારી પાસેથી ખંડણી ઉઘરાવનાર સામે ફરિયાદ

Vadodara : વડોદરાના તરસાલી રોડ પર ભક્તિનગરમાં રહેતા ભાવેશ ભેરૂલાલ કુમાવત મકરપુરા ડેપોની પાછળ શ્રી શ્યામ પસ્તી ભંડાર નામની દુકાન ચલાવે છે. મકરપુરા પોલીસ સ્ટેશનમાં ફરિયાદ નોંધાવી તેમને જણાવ્યું છે કે ગઈકાલે સવારે 8:00 વાગે મેં દુકાન ખોલી હતી. ત્યારબાદ 9:00 વાગે મારા મિત્ર હીરાલાલ ગૌતમભાઈ પાટીલ (રહે-નારાયણપુરા ડેપો) પાસે મારી દુકાને આવ્યા હતા. અમે બંને વાતચીત કરતા હતા તે દરમિયાન એક વ્યક્તિ આવ્યો હતો તેણે પોલીસ તરીકેની ઓળખાણ આપી મને જણાવ્યું હતું કે હું મકરપુરા પોલીસ સ્ટેશનથી આવું છું અને તમારો હપ્તો બાકી છે.

મેં તેને કહ્યું કે પંદર દિવસ પહેલા 200 રૂપિયા હપ્તો લઈ ગયા છે ત્યારે તેમણે જણાવ્યું કે મારી સાથેના ચાર પોલીસવાળાના બાકી છે. મેં આઈકાર્ડ માંગતા તેને કહ્યું કે મારે આઈ કાર્ડથી તમારું શું લેવાદેવા છે ? તમે ખાલી હપ્તો આપો. જેથી મેં તેઓને કહ્યું કે સાહેબ હું તો પસ્તીનો વેપાર કરું છું કોઈ ખરાબ ધંધો કરતો નથી હું શું કામ રૂપિયા આપું ? તમારું નામ શું છે? તેણે પોતાનું નામ નાનાભાઈ ઉકેળભાઈ પરમાર (રહે-ઉગમણું ફળિયું, વડદલા ગામ) જણાવી ગુસ્સેથી વાત કરી મારી પાસેથી રૂ.200 બળજબરીથી કઢાવી લીધા હતા.