Himmatnagar GIDC Incident: સાબરકાંઠાના હિંમતનગર GIDC વિસ્તારમાં આવેલી ‘પ્રમુખ ઇન્ડસ્ટ્રીઝ’માં જંતુનાશક દવાઓના પેકિંગનું કામ કરતા યુવક પર લિફ્ટ પટકાતા કમકમાટીભર્યું મોત નીપજ્યું છે. આ સમગ્ર ઘટનાના કંપારી છૂટી જાય તેવા લાઈવ CCTV ફૂટેજ સોશિયલ મીડિયામાં વાઈરલ થતા ચકચાર મચી ગઈ છે. યુવકના મોતની ઘટના બાદ ફેક્ટરી માલિક રફુચક્કર થઈ ગયો હોવાનું સામે આવ્યું છે. સમગ્ર મામલે સ્થાનિક પોલીસ ઘટનાસ્થળે પહોંચીને મૃતક યુવકના મૃતદેહને પીએમ અર્થે મોકલીને આગળની કાર્યવાહી હાથ ધરી છે.
હિંમતનગર GIDCની ફેક્ટરીમાં કામ કરતા યુવક પર લિફ્ટ પટકાતાં કમકમાટીભર્યું મોત
પ્રાપ્ત વિગતો મુજબ, હિંમતનગર નજીકના પીપલોડી ગામનો વતની દેવરાજસિંહ પરમાર નામનો યુવાન પ્રમુખ ઇન્ડસ્ટ્રીઝમાં મજૂરી કામ અર્થે આવતો હતો. ફેક્ટરીમાં જંતુનાશક દવાઓનું પેકિંગના બોક્સ લેવા જતા માલવાહક લિફ્ટ અચાનક તૂટીને સીધી યુવક પર તૂટી પડી હતી. ગણતરીની સેકન્ડોમાં ભારેખમ લિફ્ટ નીચે કચડાવાને કારણે યુવાનનું સ્થળ પર જ મોત નીપજ્યું હતું.
બે દિવસથી લિફ્ટ ખરાબ હોવાનો દાવો
સ્થાનિક સૂત્રો અને કામદારો પાસેથી મળતી વિગત મુજબ, આ ફેક્ટરીમાં લિફ્ટ છેલ્લા બે દિવસથી ખરાબ હાલતમાં હતી. જો કે, ફેક્ટરી મેનેજમેન્ટ અને માલિકો દ્વારા લિફ્ટ રીપેર કરાવવાની તસ્દી લીધી નહોતી અને મજૂરો પાસે જોખમી રીતે કામ ચાલુ રખાવ્યું હતું.
આ પણ વાંચો: ગાંધીનગર: સચિવાલયમાં શોર્ટ સર્કિટથી ધડાકો: 4 કર્મચારી દાઝ્યા, વીજળી ગુલ થતાં અફરાતફરી
ઘટનાની જાણ થતા જ સ્થાનિક પોલીસ ઘટનાસ્થળે પહોંચી હતી. પોલીસે મૃતક યુવકના મૃતદેહને પોસ્ટમોર્ટમ અર્થે હિંમતનગર સિવિલ હોસ્પિટલ ખાતે ખસેડ્યો છે. અકસ્માતના સમાચાર મળતા જ યુવકના પરિવારજનો હોસ્પિટલ ખાતે આવ્યા હતા. પોલીસે CCTV ફૂટેજ કબજે કરી આગળની કાર્યવાહી હાથ ધરી છે.
