Vadodara Gas Crisis : મધ્ય પૂર્વમાં ઈરાન અને અમેરિકા ઇઝરાયેલ વચ્ચે ચાલતા યુદ્ધની સીધી અસર વડોદરામાં પડી છે. પરિણામે કોમર્શિયલ ગેસ સિલિન્ડરની ડિલિવરી પર કંટ્રોલ મુકાયો છે જ્યારે ઘરેલુ ગેસ માટે લોકો જુદા જુદા વિસ્તારની ગેસ એજન્સીની ઓફિસો પર લાંબી કતારો લગાવીને ઉભા છે. આમ છતાં રાજ્યના મુખ્યમંત્રી દ્વારા જણાવાયું છે કે ગેસ સિલિન્ડર માટે ગભરાવવાની જરૂર નથી. ગેસ સિલિન્ડરનો પૂરતો જથ્થો હોવાનું જણાવ્યું છે આમ છતાં પણ હજી લોકોનો ગભરાટ ઓછો થયો નથી ત્યારે જિલ્લા કલેક્ટર કચેરી ખાતે કંટ્રોલરૂમ શરૂ કરવામાં આવ્યો છે. આ કંટ્રોલ રૂમ આજે વહેલી સવારથી જ કાર્યરત થઈને ગેસ ગ્રાહકોને જરૂરી સલાહ સૂચન આપી રહ્યા છે.
ઉલ્લેખનીય છે કે મધ્ય પૂર્વમાં યુદ્ધ ફાટી નીકળ્યું છે. 15 દિવસથી ચાલતા યુદ્ધનો ક્યાંય અંત દેખાતો નથી. આ યુદ્ધની સીધી અસર ગેસ અને પેટ્રોલિયમ પેદાશો પર પડી છે. વિવિધ રાજ્યના જુદા જુદા શહેરોમાં ગેસના સિલિન્ડર મેળવવા માટે લાંબી લાઈનો લોકોએ લગાવી દીધી છે. જેમાંથી વડોદરા પણ બાકાત રહ્યું નથી. પરિણામે શહેરની તમામ ગેસ એજન્સીઓ બહાર ગ્રાહકો વહેલી સવારથી જ સિલિન્ડર મેળવવા માટે લાઈન લગાવી દેતા સ્પષ્ટ નજરે ચડી ગયા છે. ગેસ સિલિન્ડરની લાઈન માટે કેટલી વાર લોકોમાં બોલાચાલી અને મારામારીના પણ દ્રશ્યો હવે નવા રહ્યા નથી.
દરમિયાન રાજ્યના મુખ્યમંત્રી ભુપેન્દ્ર પટેલ દ્વારા ગેસ સિલિન્ડર માટે લોકોએ ગભરાવાની જરૂર નથી. પૂરતો જથ્થો હોવાની તેમને જાહેરાત કરી હોવા છતાં પણ લોકોનો ગભરાટ ઓછો થતો નથી ત્યારે જિલ્લા કલેકટર કચેરી ખાતે આ અંગે આજે સવારથી જ કંટ્રોલરૂમ શરૂ કરી દેવાયો છે. કંટ્રોલરૂમ શરૂ થતા જ માત્ર એક થી દોઢ કલાકમાં જ 70થી 75 ફોન આવ્યા હોવાનું જાણવા મળ્યું છે. શહેરના વાઘોડિયા રોડ, સમા, બાજવા સહિતના વિવિધ વિસ્તારોમાંથી ગેસ સિલિન્ડર બાબતે જુદી જુદી ફરિયાદો ગ્રાહકો દ્વારા કરવામાં આવી હતી. ફરિયાદ કરનાર તમામને ખૂબ જ શાંતિથી ઝોન મુજબ વિવિધ કોન્ટેક નંબરો આપીને તેમની સમસ્યા હલ કરવા પ્રયાસ કરવામાં આવ્યો હતો. શહેરમાં શરૂ કરાયેલા કંટ્રોલરૂમના ફોનની ઘંટડીઓ સતત રણકતી રહી હતી.
