વડોદરા: નશામાં ધૂત પિતા-પુત્રના ઝઘડામાં પોલીસની 112 ટીમ હુમલો, બેની ધરપકડ

Vadodara News: વડોદરાના તરસાલી બાયપાસ વિસ્તારમાં દારૂના નશામાં ઝઘડતા પિતા-પુત્રને શાંત પાડવા પહોંચેલી પોલીસની 112 ટીમ પર હુમલો થયાની ઘટના સામે આવી છે. નશામાં ધૂત પુત્રએ પોલીસ જવાન સાથે ઝપાઝપી કરી ફરજમાં રુકાવટ ઊભી કરતા કપૂરાઈ પોલીસે બંને સામે ગુનો નોંધી કાયદેસરની કાર્યવાહી હાથ ધરી છે.

ઘરેલુ ઝઘડો શાંત પાડવા પહોંચી હતી પોલીસ

મળતી માહિતી અનુસાર, માંજલપુર પોલીસ સ્ટેશનના 112 પોલીસ ટીમને ગત રાત્રે તેમને સંદેશો મળ્યો હતો કે તરસાલી બાયપાસ પાસે આવેલી શ્રીજી આંગન સોસાયટીમાં પિતા-પુત્ર વચ્ચે ઝઘડો ચાલી રહ્યો છે. આ માહિતીના આધારે ઇન્ચાર્જ હેડ કોન્સ્ટેબલ અને ડ્રાઇવર વિષ્ણુ બારીયા તાત્કાલિક ઘટનાસ્થળે દોડી ગયા હતા.

આ પણ વાંચો: વડોદરા: નશામાં ચૂર સિક્યુરિટી ગાર્ડે જાહેરમાં ફાયરિંગ કર્યું, બંદૂક-કારતૂસ સાથે પોલીસે અટકાયત કરી

પોલીસ જ્યારે સોસાયટીમાં પહોંચી ત્યારે વિનુ રોહિત અને બીપીન રોહિત નામની બે વ્યક્તિઓ નશાની હાલતમાં ઝપાઝપી કરતા જોવા મળ્યા હતા. પોલીસે બંનેને છૂટા પાડી પ્રાથમિક પૂછપરછ કરી હતી. બંને શખસો નશામાં હોવાથી પોલીસે તેમને ગાડીમાં બેસાડવાનો પ્રયાસ કર્યો હતો. આ દરમિયાન બીપીન રોહિત ઉશ્કેરાઈ ગયો હતો અને તેણે પોલીસ વાનના ડ્રાઇવર વિષ્ણુ બારીયા સાથે ઝપાઝપી કરી હતી.

કપૂરાઈ પોલીસે બે અલગ-અલગ ગુના નોંધ્યા

આ મામલે પોલીસની કાયદેસરની ફરજમાં અડચણ ઊભી કરવા બદલ અને દારૂ પીવા મામલે કપૂરાઈ પોલીસે કડક વલણ અપનાવ્યું છે.  આરોપી બીપીન રોહિત સામે પોલીસની ફરજમાં રુકાવટ તેમજ પ્રોહિબિશન એક્ટ હેઠળ ગુનો નોંધવામાં આવ્યો છે. જ્યારે વિનુ રોહિત સામે નશો કરવા બદલ પ્રોહિબિશન એક્ટ મુજબ ગુનો દાખલ કરાયો છે. હાલે પોલીસે બંનેની અટકાયત કરી વધુ તપાસ હાથ ધરી છે.