વડોદરામાં ફરી બેવડી ઋતુ: વહેલી સવારે ઠંડીનો અહેસાસ: તાપમાનનો પારો 19 ડિગ્રી: 11 વાગ્યા સુધી સૂરજના દર્શન દુર્લભ

હિમાચલ સહિત મનાલીમાં થયેલી બરફ વર્ષાની સીધી અસર વડોદરા પર થઈ છે. તાપમાનનો પારો આજે 19 ડિગ્રી થવા છતાં વહેલી સવારે ઠંડીનો ચમકારો યથાવત રહ્યો છે. આજે સવારથી ધુમ્મસવાળા વાતાવરણને કારણે સુરજદાદાના દર્શન પણ સવારે 11 વાગ્યા સુધી ન હતા. પવનની ગતિના કારણે સવારે ઠંડીનો અહેસાસ થતો હતો. 

ઉલ્લેખનીય છે કે, પતંગ ઉત્સવે વાસી ઉતરાયણના દિવસે ઠંડીનો પારો 10 ડિગ્રી થયો હતો. પરંતુ ત્યારબાદ ગરમીનો પારો સતત ઉંચે જઈ રહ્યો હતો. તા. 22મીએ પારો 19 ડિગ્રીએ પહોંચી ગઈકાલે તા. 23મીએ 17.8 ડિગ્રી તાપમાન રહ્યું હતું. પરિણામે બપોરે ગરમીનો અહેસાસ થતો હતો. દરમિયાન હિમાલય અને મનાલી ખાતે બરફની સફેદ ચાદર પથરાઈ જતા તેની સીધી અસરનો અહેસાસ વડોદરામાં થઇ હતી. જેથી ઠંડીનો અહેસાસ યથાવત રહ્યો હતો.

તાપમાનનો પારો આજે 19 ડિગ્રી રહ્યો હતો. પરંતુ ધુમ્મસના કારણે ઠંડીની અસર થઈ રહી હતી. ધુમ્મસના કારણે સુરજદાદાના દર્શન સવારે 11 વાગ્યા સુધી દુર્લભ રહ્યા હતા. જ્યારે વાતાવરણ વાદળીયુ જણાતું હતું. આગામી દિશામાં વાદળા ખસતા ફરી એકવાર ઠંડીનો રાઉન્ડ શરૂ થવાની શક્યતા નકારી શકાતી નથી.