Dholera SIR to Become Global AI Hub: ભારતની AI ક્રાંતિમાં અગ્રેસર રહેવાના નિર્ધાર સાથે ગુજરાત સરકારે નવી દિલ્હીમાં યોજાયેલી 'ઇન્ડિયા AI ઇમ્પેક્ટ સમિટ 2026' દરમિયાન એક સીમાચિહ્નરૂપ સમજૂતી કરાર (MOU) કર્યા છે. રાજ્યના સાયન્સ એન્ડ ટેકનોલોજી વિભાગ અને લાર્સન એન્ડ ટ્રુબ્રો (L&T) વ્યોમા વચ્ચે ધોલેરા SIR ખાતે 250 મેગાવોટના હાઇપરસ્કેલ ગ્રીન AI રેડી ડેટા સેન્ટરની સ્થાપના માટે એમ.ઓ.યુ. સંપન્ન થયા છે.
રૂપિયા 25 હજાર કરોડનું માતબર રોકાણ
રાજ્યના વન, પર્યાવરણ અને સાયન્સ-ટેકનોલોજી મંત્રીની ઉપસ્થિતિમાં થયેલા આ કરાર મુજબ, L&T વ્યોમા આ પ્રોજેક્ટમાં રૂ. 25,000 કરોડનું જંગી રોકાણ કરશે. આ અત્યાધુનિક ડેટા સેન્ટર વર્ષ 2028 સુધીમાં કાર્યરત થઈ જવાની સંભાવના છે. આ પ્રોજેક્ટ ગુજરાતની IT/ITeS નીતિ (2022-27) ને નવી ઊંચાઈએ લઈ જશે.
ધોલેરા SIR: ભવિષ્યનું ડિજિટલ હબ
ધોલેરા ખાતે પ્રસ્તાવિત આ કેમ્પસ માત્ર ઇન્ફ્રાસ્ટ્રક્ચર પૂરતું મર્યાદિત નહીં રહે, પરંતુ તે AI ટ્રેનિંગ, ક્લાઉડ કમ્પ્યુટિંગ અને એડવાન્સ્ડ એનાલિટિક્સ માટે એક સક્ષમ ઇકોસિસ્ટમ પૂરું પાડશે. આનાથી રાજ્યમાં હજારો પ્રત્યક્ષ અને પરોક્ષ રોજગારીની તકો ઊભી થશે. ગ્લોબલ ક્લાઉડ અને AI ટેક કંપનીઓ ગુજરાત તરફ આકર્ષિત થશે. અને સસ્ટેનેબલ અને ગ્રીન ટેકનોલોજીને વેગ મળશે તેવા દાવા કરવામાં આવ્યા છે.
સરકારની કટિબદ્ધતા અને બજેટ
ગુજરાત સરકારે આ વર્ષના બજેટમાં AI અને ડિજિટલ ગવર્નન્સ માટે રૂ. 850 કરોડથી વધુની જોગવાઈ કરી છે, જે રાજ્યની ટેકનોલોજી પ્રત્યેની પ્રતિબદ્ધતા દર્શાવે છે. આ MOU હેઠળ L&T વ્યોમા જમીન અને માળખાગત સુવિધાઓનું વિગતવાર મૂલ્યાંકન કરશે, જ્યારે સરકાર પ્રોજેક્ટને ઝડપથી અમલી બનાવવા સક્ષમ માળખું પૂરું પાડશે. આ પગલું ગુજરાતને માત્ર ભારતનું જ નહીં પણ વૈશ્વિક સ્તરનું AI ઇન્ફ્રાસ્ટ્રક્ચર હબ બનાવવાની દિશામાં માઈલસ્ટોન સાબિત થશે.
