ડીઈઓ કચેરીએ તમામ ફાઈલો ઈ-સરકાર પોર્ટલ થકી ઓનલાઈન જ મોકલવાની રહેશે

વડોદરાઃ ગુજરાત સરકારના શિક્ષણ વિભાગે એક પરિપત્ર બહાર પાડીને વડોદરા સહિત તમામ ડીઈઓ કચેરીઓને ઈ- સરકાર પોર્ટલ થકી જ તમામ ફાઈલો શિક્ષણ વિભાગને મોકલવાની તાકીદ કરી છે.સાથે સાથે  ફાઈલની હાર્ડ કોપી પર પ્રતિબંધ મૂકયો છે.જો કોઈ ડીઈઓ કચેરી ફાઈલની હાર્ડ કોપી શિક્ષણ વિભાગને મોકલશે તો તે ડીઈઓ સામે કાર્યવાહી કરવાની પણ ચીમકી આપી છે.

શૈક્ષણિક આલમના સૂત્રોના જણાવ્યા પ્રમાણે અત્યાર સુધી સ્કૂલો દ્વારા પગાર બિલ, વર્ગ વધારો, વર્ગ બંધ કરવાની દરખાસ્ત, એરિયર્સ, એલટીસી બિલ જેવી તમામ બાબતોની ફાઈલો ડીઈઓ કચેરીને મોકલવામાં આવતી હોય છે.આ ફાઈલો કચેરી દ્વારા ગાંધીનગર ખાતે શિક્ષણ વિભાગને મંજૂરી મોકલવામાં આવે છે.જોકે હવે સરકારે ડીઈઓ કચેરી અને શિક્ષણ વિભાગ વચ્ચે પેપરલેસ કામગીરીના આશયથી ઈ સરકાર નામનું પોર્ટલ લોન્ચ કર્યું છે.

જેના અનુસંધાનમાં શિક્ષણ વિભાગે પરિપત્ર બહાર પાડીને ડીઈઓ કચેરીને મેડિકલ બિલ તેમજ સર્વિસ બૂક સિવાયની તમામ ફાઈલો આ પોર્ટલ થકી ઓનલાઈન મોકલવા માટે આદેશ આપ્યો છે.સરકારે આ આદેશનો અમલ ૧૫ જાન્યુઆરીથી શરુ કરી દીધો છે.

શિક્ષકો- કર્મચારીઓની ફાઈલો વહેલી મંજૂર થશે

વડોદરાની એક સ્કૂલના આચાર્યે કહ્યું હતું કે, જો સરકાર આ પરિપત્રનો યોગ્ય રીતે અમલ કરે તો શિક્ષકો અને કર્મચારીઓની ફાઈલો ઓછા સમયમાં મંજૂર થઈ જશે.અત્યારે ફાઈલો ટેબલે- ટેબલે ફરે છે, તેની જગ્યાએ સબંધિત ટેબલ પર જ ઓનલાઈન ફાઈલ પહોંચી જશે.ઉપરાંત ફાઈલો આડી અવળી મૂકાઈ ગઈ છે કે ખોવાઈ ગઈ છે તેવી ફરિયાદો પણ ઉભી નહીં થાય.જોકે સ્કૂલોએ ડીઈઓ કચેરીને ફાઈલો કેવી રીતે મોકલવાની તે અંગે હજી સુધી કોઈ સ્પષ્ટતા થઈ નથી.જેના કારણે અત્યારના તબક્કે તો સ્કૂલોએ પોતાની ફાઈલો ડીઈઓ કચેરીને હાર્ડ કોપીના સ્વરુપમાં જ મોકલવાનું ચાલું રાખ્યું છે.