ગુજરાતમાં દારૂબંધી છતાં ચૂંટણી ટાણે ડાંગમાં ‘ડ્રાય ડે’ જાહેર! મેજિસ્ટ્રેટના આદેશથી લોકોમાં આશ્ચર્ય

Dang District Dry Day: ગુજરાત દારૂબંધી વચ્ચે સ્થાનિક સ્વરાજયની સંસ્થાઓની ચૂંટણીઓને ધ્યાનમાં રાખી તા. 24 ના સાંજથી તા. 26 ના સાંજ સુધી અને તા. 28 ને મંગળવારના દિવસને ડ્રાય ડે જાહેર કરતું જાહેરનામુ જિલ્લા મેજીસ્ટ્રેટ બહાર પાડતા આશ્ચર્ય ફેલાયું છે.ગુજરાતમાં દારૂબંધી ક્યારથી હટી ગઇ તે અંગે પણ લોકો ચર્ચા કરવા લાગ્યા છે. 

24 થી 26 ના રોજ ડ્રાય ડે જાહેર કરાયો

ડાંગ જિલ્લામાં 24 ના સાંજથી 26 સાંજ સુધી અને 28ના રોજ દારૂના વેચાણ-પીરસવા પર પ્રતિબંધ લગાવવામાં આવ્યો છે. ચૂંટણી પંચની સૂચના મુજબ, ચૂંટણી દરમિયાન મતદારો નિર્ભય પણે મતદાન કરી શકે તે માટે દારૂ અને નશાકારક ચીજોના વેચાણ પર પ્રતિબંધ મુકવામાં આવ્યો છે. જેને અનુલક્ષીને ડાંગ જિલ્લા મેજીસ્ટ્રેટ શાલિની દુહાને, મુંબઈ પ્રોહીબીશન અધિનિયમ-1949 ની કલમ-142(1) હેઠળ એક જાહેરનામા દ્વારા કેટલાક પ્રતિબંધો જાહેર કર્યા છે. જેમાં તા. 26ને રવિવારે મતદાનનો સમય પુરો થવાના કલાક સાથે પુરા થાય તે રીતે 48 કલાકનો સમય એટલે કે તા. 24ના સાંજના 06-00 કલાકથી તા. 26ના સાંજના 6-00 કલાક (જો તા. 27ના પુનઃ મતદાન થાય તો પુનઃ મતદાનનો દિવસ પણ આવરી લઈ) તેમજ મતગણતરી દિવસ તા. 28ના રોજ મતગણતરી પુર્ણ ન થાય ત્યાં સુધી દારૂ વેચાણ કરવા/પીરસવા પર પ્રતિબંધ ફરમાવવામાં આવ્યો છે. તેમજ આ સમયગાળાને ‘ડ્રાય ડે’ તરીકે જાહેર કરવામાં આવ્યો છે. 

આ પણ વાંચો :હોર્મુઝ અંગે ફરી આરપારની જંગના એંધાણ! ટ્રમ્પના આદેશ બાદ અમેરિકા જપ્ત કર્યું જહાજ, ઈરાને કહ્યું- વળતો જવાબ આપીશું

પોલીસને પણ જાહેરનામા ભંગ કરનાર વિરુદ્ધ કાર્યવાહીના આદેશ!

આ જાહેરનામાનો ભંગ/ઉલ્લંઘન કરનાર ગુજરાત પોલીસ અધિનિયમ 1951ની કલમ 135 હેઠળ શિક્ષાને પાત્ર ઠરશે. આ માટે ડાંગ જિલ્લામાં ફરજ બજાવતા પોલીસ સબ ઇન્સપેક્ટર કે તેનાથી ઉપરનો હોદ્દો ધરાવનાર તમામ પોલીસ અધિકારીઓને આ જાહેરનામાનો ભંગ કરનાર શખ્સો વિરૂદ્ધ ફરિયાદ કરવા માટે અધિકૃત કરવામાં આવ્યા છે. ઉલ્લેખનિય છે કે, ગુજરાતમાં દારૂબંધી હોવા છતાં આ પ્રકારનું જાહેરનામું બહાર પાડવામાં આવતા લોકોમાં આશ્ચર્ય ફેલાયું છે.