ગીરગઢડાના હરમડીયા નજીક સાંગવાડી નદી કાંઠે પિતાએ પુત્રને બચાવવા નદીમાં કૂદકો માર્યો પરંતુ મગર ઉંડા પાણીમાં જતો રહ્યો : 6 બહેનોના એકના એક ભાઈના મોતથી અરેરાટી
ઉના, : ગીરગઢડા તાલુકાના હરમડીયા નજીક આવેલી સાંગવાડી નદીના કિનારે પિતા-પુત્ર હાથ-પગ ધોઈ રહ્યા હતા ત્યારે નદીમાંથી મહાકાય મગર આવ્યો હતો અને પિતાની નજર સામે જ તરૂણ પુત્રને જડબામાં પકડી ઉંડા પાણીમાં જતો રહ્યો હતો. પુત્રને બચાવવા પિતાએ નદીમાં કૂદકો માર્યો હતો પરંતુ પુત્ર બચી શક્યો ન હતો. આખરે પ કલાક બાદ સામા કાંઠેથી તરૂણનો મૃતદેહ મળી આવ્યો હતો. છ બહેનોના એકના એક ભાઈના મોતથી અરેરાટી વ્યાપી ગઈ હતી.
આ અંગેની વધુ વિગત મુજબ મુળ કોડીનાર તાલુકાના ફાફણી ગામના અને હાલ ગીરગઢડા તાલુકાના હરમડીયાની સીમમાં કેરી વેળવાનો ઈજારો રાખી ગુજરાન ચલાવતા દિનેશભાઈ સોલંકી તથા તેનો પુત્ર વિવાન (ઉ.વ.13) દિવસભર ફળ ઉતારી સાંજે હરમડીયા અને એભલવડ વચ્ચે પસાર થતી સાંગવાડી નદીના કાંઠે હાથ-પગ ધોવા ગયા હતા. પિતા-પુત્ર હાથ-પગ ધોઈ રહ્યા હતા ત્યારે નદી કિનારે એક વિશાળકાય મગર ચડી આવ્યો હતો અને વિવાન તથા તેના પિતા દિનેશભાઈ કંઈ સમજે તે પહેલા જ મગર વિવાનને જડબામાં લઈ નદીમાં જતો રહ્યો હતો. આ દ્રશ્ય જોઈ દિનેશભાઈએ પુત્રને બચાવવા નદીમાં કૂદકો માર્યો હતો પરંતુ મગર ઉંડા પાણીમાં જતો રહ્યો હતો અને વિવાનને જડબામાં લઈ ફંગોળવા લાગ્યો હતો. દિનેશભાઈએ બુમાબુમ કરતા આસપાસના લોકો એકત્ર થઈ ગયા હતા. આ અંગે જાણ થતા પોલીસ અને વન વિભાગનો સ્ટાફ ઘટના સ્થળે પહોંચ્યો હતો. આખરે પ કલાક બાદ રાત્રે બારેક વાગ્યા આસપાસ સામા કાંઠા વિસ્તારમાંથી વિવાનનો મગરે ફાડી ખાધેલી હાલતમાં મૃતદેહ મળી આવ્યો હતો. જેને ગીરગઢડા સરકારી હોસ્પિટલ ખાતે પીએમમાં ખસેડાયો હતો. દિનેશભાઈને છ પુત્રી અને વિવાન એક જ પુત્ર હતો. છ બહેનોએ એકનો એક ભાઈ ગુમાવતા પરિવારમાં કલ્પાત સર્જાયો હતો.
