લુખ્ખાઓ વિશે માહિતી આપવા માટે ક્રાઇમ બ્રાંચે વોટ્સએપ નંબર જાહેર કર્યો

રાજકોટને બાનમાં લેનાર લુખ્ખાઓ સામે રહી-રહીને પોલીસ જાગી : ક્રાઇમ બ્રાંચે માહિતી આપનારનું નામ-સરનામું સુરક્ષિત રાખવાની અને યોગ્ય ઇનામ આપવાની પણ જાહેરાત કરી 

રાજકોટ, : શહેરમાં લુખ્ખાઓએ પોલીસની આબરૂના ચીથરે ચીથરા ઉડાડી દીધા છે. છેલ્લા ઘણા સમયથી લુખ્ખાઓએ શહેરને બાનમાં લીધું હોય તેવી પરિસ્થિતિ સર્જાઇ છે. આમ છતાં પોલીસની ઉંઘ ઉડતી નહોતી. તાજેતરમાં મંગળા રોડ પર ગેંગવોરને કારણે બે જૂથે અંધાધૂંધ ફાયરીંગ કરતાં તેના ઘેરા પ્રત્યાઘાતો પડયા હતાં. એટલું જ નહીં શહેરમાં કાયદો-વ્યવસ્થાની પરિસ્થિતિ સામે સવાલો ઉઠયા છે.

આ સ્થિતિમાં હવે ઉચ્ચ પોલીસ અધિકારીઓની ઉંઘ ઉડી છે. જેને કારણે લુખ્ખાઓ સામે કડક કાર્યવાહીના આદેશો આપ્યા છે. મંગળા રોડ પરના ફાયરીંગની ઘટના બાદ હાલ પોલીસે શહેરમાં મોડી રાત સુધી ખુલ્લી રહેતી લારીઓ-દુકાનો બંધ કરાવવાનું શરૂ કર્યું છે. ત્યાર પછી વધુ એક પગલું લઇ ક્રાઇમ બ્રાંચે હવે લુખ્ખાઓ અંગે માહિતી આપવા અનુરોધ કર્યો છે.

આ માટે ક્રાઇમ બ્રાંચે મોબાઇલ નંબર 63596 29896 જાહેર કર્યો છે. ક્રાઇમ બ્રાંચે લોકોને તેમનાં ઘર, ઓફિસ, નોકરી સહિતનાં સ્થળો આસપાસ ભય ફેલાવનાર કે લુખ્ખાગીરી કરનાર ઉપરાંત કોઇપણ પ્રકારની ગેરકાયદે પ્રવૃત્તિ કરનાર શખ્સો અંગે જાહેર કરાયેલા વોટ્સએપ નંબર ઉપર જાણકારી આપવા અનુરોધ કર્યો છે. 

સાથોસાથ માહિતી આપનારનું નામ અને સરનામું સુરક્ષિત રાખવામાં આવશે તેવી પણ ખાતરી આપી છે. આ ઉપરાંત યોગ્ય ઇનામ આપવાની પણ જાહેરાત કરી છે. 

જો કે આ અગાઉ પણ લુખ્ખાઓ વિરૂધ્ધ કાર્યવાહી કરવા માટે આ રીતે ક્રાઇમ બ્રાંચે મોબાઇલ નંબર જાહેર કર્યો હતો, જેનું પછીથી શું થયું તે વિશે કોઇ જાણકારી જાહેર કરાઇ નથી પરંતુ હવે વધુ એક વખત ક્રાઇમ બ્રાંચે મોબાઇલ નંબર જાહેર કર્યો છે.  ઉલ્લેખનીય છે કે શહેરમાં છેલ્લા ઘણા સમયથી લુખ્ખાઓએ માઝા મૂકી છે. સ્થાનિક પોલીસની ઢીલી નીતિને કારણે જ લુખ્ખાઓ બેફામ બન્યા છે. આ સ્થિતિમાં હવે લુખ્ખાઓને સીધાદાર કરવાની જવાબદારી ક્રાઇમ બ્રાંચને સોંપવામાં આવી છે. જે બાબત સ્થાનિક પોલીસ અને તેના ઇન્ચાર્જો માટે શરમજનક ગણાય તેવી છે.