આણંદમાં નોકરી કરતી યુવતી પર સુરતના યુવકે દુષ્કર્મ ગુજારીને રૂ. 28 લાખ પડાવ્યાની ફરિયાદ

લગ્ન કરવાની અને વિદેશ મોકલવાની લાલચ આપી યુવતીને પ્રેમજાળમાં ફસાવી 

2022માં યુવતી સુરત ફરવા ગઇ ત્યારે યુવક સાથે પરિચય થયો હતો  મૂળ રાજકોટની યુવતીએ છેતરપિંડી અને વિશ્વાસઘાતનો ગુનો નોંધાવ્યો

અવારનવાર પ્રેમજાળમાં ફસાવી મોટા મોટા સપના બતાવી વિશ્વાસમાં લઈ છેતરપિંડી અને વિશ્વાસઘાતના કિસ્સાઓ બની રહ્યાં છે. 

જેમાં યુવક-યુવતીઓએ બહુ મોટું ઋણ ચૂકવવું પડતું અને મસમોટી રકમ પણ ગુમાવવી પડતી હોય છે. ત્યારે આવો વધુ એક કિસ્સો સામે આવ્યો છે. મૂળ રાજકોટની અને હાલ આણંદ ખાતે નોકરી કરતી એક યુવતી વર્ષ ૨૦૨૨માં સુરત ખાતે ફરવા માટે ગઈ હતી. દરમિયાન તેણી સુરતના યુવક ધવલ ગોંડલિયાના પરિચયમાં આવી હતી અને આ પરિચય ધીરે ધીરે પ્રેમમાં પરિણમ્યો હતો. બાદમાં યુવકે આણંદ ખાતે આવીને અવારનવાર યુવતીને મળી તેણીને લગ્ન કરવાની લાલચ આપી તેણી સાથે દુષ્કર્મ ગુજાર્યું હતું. ત્યારબાદ યુવકે યુવતીને વિદેશ જવાની લાલચ આપી તેણી પાસેથી ટુકડે ટુકડે કરી રૂપિયા ૨૮ લાખ પડાવી લીધા હતા. બાદમાં યુવકે તેણી સાથે લગ્ન પણ નહીં કરી વિદેશ જવાની પણ કોઈ કાર્યવાહી કરી નહોતી. જેથી યુવતીને પોતાની સાથે વિશ્વાસઘાત અને છેતરપિંડી થઈ હોવાનું જણાતા તેણીએ આણંદ શહેર પોલીસ મથકમાં ફરિયાદ નોંધાવતા પોલીસે સુરતના યુવક ધવલ ગોંડલિયા વિરુદ્ધ ગુનો નોંધી વધુ તપાસ હાથ ધરવામાં આવી હતી.