VIDEO | સુરત અને વડોદરામાં કોમર્શિયલ ગેસ સિલિન્ડરની અછત! હોટલ, રેસ્ટોરન્ટ સહિતના ધંધાર્થીઓ ચિંતામાં

Commercial LPG Shortage: ઈરાન અને ઈઝરાયલ વચ્ચે ચાલી રહેલા યુદ્ધના કારણે ઉદ્યોગો માટેના ગેસના પુરવઠામાં ઘટ સર્જાઈ છે, ત્યારે સુરત, વડોદરા, સહિતના શહેરોમાં કોમર્શિયલ ગેસ સિલિન્ડરની પણ અછત સર્જાતા હોટલ, રેસ્ટોરન્ટ અને કેફે સહિતના વ્યવસાયને માઠી અસર પડી રહી છે. અગાઉ ગુજરાત પ્રદૂષણ નિયંત્રણ બોર્ડ(GPCB) પરિપત્ર જાહેર કરીને માન્યતા પ્રાપ્ત પ્રવાહી બળતણ વાપરવાની હંગામી મંજૂરી આપી હતી. 

યુદ્ધની અસર કોમર્શિયલ ગેસ સિલિન્ડર પર

મળતી માહિતી મુજબ, મિડલ-ઈસ્ટમાં ચાલી રહેલા યુદ્ધની સીધી અસર વેપારીઓ અને ગૃહિણી પર પણ વર્તાઈ રહી છે. જેમાં યુદ્ધના કારણે આંતરરાષ્ટ્રીય સ્તરે ગેસ સપ્લાય ચેઈનમાં અવરોધ ઉભો થતાં ગેસની ઘટના જોવા મળી રહી છે. સુરતમાં અંદાજે 67 જેટલાં કોમર્શિયલ ગેસ ડિસ્ટ્રીબ્યુટર્સ છે. જેમાં ગેસ ન મળવાથી લોકોને હાલાકી પડી રહી છે. 

આ પણ વાંચો: ઈરાન યુદ્ધને પગલે દેશમાં 'જીવનજરૂરી ચીજવસ્તુ કાયદો' લાગુ, સરકારે નક્કી કર્યું કોને પહેલા મળશે ગેસ

સુરતમાં કોમર્શિયલ સિલિન્ડરની ઘટથી ધંધાર્થીઓ ચિંતામાં

સુરતમાં કોમર્શિયલ સિલિન્ડર મેળવવા માટે 10-15 દિવસનું વેઈટિંગ હોવાનું ગેસ એજન્સીના સંચાલકો જણાવી રહ્યા છે. આમ, યુદ્ધની સીધી રીતે અસર ગેસ સપ્લાય ચેઈનમાં પડી રહી હોવાથી સુરત સહિતના શહેરોમાં ગેસની અસર વર્તાઈ રહી છે. જેના કારણે અનેક ધંધાર્થીઓ ચિંતામાં મૂકાયા છે.

આ પણ વાંચો: યુદ્ધને કારણે ઉદ્યોગો માટેના ગેસના પુરવઠામાં ઘટ, માન્યતા પ્રાપ્ત પ્રવાહી બળતણ વાપરવાની GPCBની હંગામી મંજૂરી

વડોદરામાં પણ કોમર્શિયલ ગેસ સિલિન્ડરની અછત

વડોદરા શહેરમાં પણ કોમર્શિયલ ગેસ સિલિન્ડરની અછતના કારણે વેપારી સહિતના લોકોને હાલાકી પડી રહી છે. ડિસ્ટ્રિબ્યુટર એસોસિએશનના જણાવ્યા અનુસાર, વડોદરામાં દિવસના 14 હજાર સિલિન્ડરની જરૂરિયાત છે, તેની સામે હાલ 20 હજારની ઇન્ક્વાયરી આવે છે. હાલની પરિસ્થિતિને જોતા લોકો આગામી સમયને ધ્યાનમાં રાખીને ગેસ સિલિન્ડરની માંગ કરી રહ્યા છે. જો કે, માંગ અને પુરવઠા વચ્ચેના તફવતના કારણે આ સમસ્યા ઉભી થઈ છે. શહેરમાં કુલ 36 જેટલાં ડિસ્ટ્રીબ્યુટર્સ છે.